Годинава ќе биде воспоставен бренд „словенечко пиво“

Членовите на Здружението на словенечки пиварници на годишниот состанок одржан на 5 март, се договорија да воспостават бренд „словенечко пиво".

На состанокот беше истакнат проблемот со високите акцизи. За малите пиварници тие се намалени за половина, а за големите пиварници сè уште се многу високи. Според нив, тоа им пречи во поглед на конкуренцијата во ЕУ.

Акцизите за пиво и алкохолни пијалаци во Словенија се несразмерни со акцизите во ЕУ, бидејќи во Словенија се 1:1,5, а во ЕУ 1:3. Статус на мали пиварници можат да добијат оние кои произведуваат најмногу 20.000 хектолитри пиво.

Здружението на словенечки пиварници, кое претставува повеќе од 99 отсто од сите производители на словенечко пиво, годинава има намера да воспостави бренд „словенечко пиво", а истовремено јавноста ќе ја информира за одговорна консумација на пиво.

Словенечките пиварници годишно произведуваат нешто помалку од два милиони хектолитри пиво, од кои околу 1,5 милиони се пијат на домашниот пазар. Околу 40 отсто пиво се продаваат во угостителските објекти, хотели и ресторани, а другиот дел во продавниците.