Доделен Халал сертификат на „Дукат“

По успешно спроведениот процес на сертификација, на компанијата „Дукат" службено ѝ е доделен Халал сертификатот, со кој се потврдува имплементацијата на Халал стандардот во процесот на набавка, прием и складирање на суровините, производство, пакување, означување, складирање и дистрибуција. 

Сертификатот го додели раководителот на Центарот за сертификација на Халал квалитетот, Исламската заедница во Хрватска, Алдин Дугоњиќ, кој им се заблагодари и им честита на Управата и на вработените во фирмата за препознавањето на потенцијалот на пазарот Халал, како и за барањата на потрошувачите за дополнителниот квалитет. Сертификатот го примија Горан Нидоган, директор за квлитетот на фирмата и Енвер Шишиќ, директор на фабриката „Дукат" во Загреб. 

Воведувањето на Халал стандардот е уште една потврда за трајната вредност на квалитетот и одличноста на „Дукат" во сите сегменти на работењето и подготвеноста на компанијата да ги задоволи барањата на потрошувачите, рече Шишиќ.

На сертификацијата ѝ претходеше прилагодување на деловните процеси, за производите да одговараат на Халал стандардот, како и едукација на 19 вработени во „Дукат", кои се задолжени за имплементација и одржување на стандардот и квалитетот.

Со ова на „Дукат" им се отвора дополнителна можност за извоз во 44 арапски земји со повеќе од 1,5 милијарди жители, чија законска регулатива бара Халал сертификација. Дополнително расте и пазарот Халал во Европската унија, а неговата вредност достигнува 66 милијарди долари годишно. Овој сертификат е потврда за квалитетот на производите (таквата храна не смее да содржи ГМО), па нивната побарувачка е важна и меѓу потрошувачите кои не се од исламска вероисповест.