„Делез“ не се повлекува

Белгискиот трговски синџир „Делез" не планира да се повлекува од Србија и во оваа година ќе продолжи со реновирање на своите продажни објекти, изјави за „Бета" генералниот директор на компанијата „Делез"- Србија, Џон Кирицис.

Намерата на „Делез" е да биде број еден на сите пазари каде што работи. Во тоа не успеавме во Црна Гора, Бугарија, Албанија и БиХ. Тие пазари бараа премногу труд, а бидејќи тоа не е исплатиливо, се повлековме и одлучивме да останеме фокусирани на Србија, изјави Кирицис.

Според неговите зборови, најдобар доказ дека „Делез" не се повлекува од Србија е неодамна отворениот дистрибутивен центар во Стара Пазова, вреден 50 милиони евра. Тој нагласи дека во 2014 година „Делез" отвори девет нови објекти во Србија – еден „Темпо" во Шабац, седум продавници „Макси" и една „Шоп & го", а реновирани се 38 објекти.

Во прилог на тоа дека не се повлекуваме од пазарот во Србија говори и тоа дека ребрендиравме 150 продавници „Мини макси" во објекти „Шоп & го", а во јануари ќе ги ребрендираме и останатите 40 објекти од овој формат, додаде тој.

Тој нагласи дека компанијата работи во тешко економско окружување, но според него доаѓањето на нови трговски синџири во Србија нема да влијае на намалувањето на цените на производите во трговските објекти.