„Делез“ најавува нови инвестиции во 2014 година

Трговскиот синџир „Делез"- Србија планира во текот на 2014 година во Србија да реализира нови инвестиции и да отвори од 10 до 20 нови објекти.

Како што за „Танјуг" информира генералниот директор на компанијата, Џон Кирицис, во план е вработување на околу 600 нови работници. Коментирајќи ја можноста за пристигнување на нови трговски синџири, Кирицис рече дека е добро кога постои конкуренција и кога доаѓаат нови играчи, бидејќи тоа ќе донесе подобри услови за потрошувачите, а цените ќе бидат поповолни. Не ѝ се плашиме -  ја сакаме, бидејќи таа влијае за подобрување на тргувањето и  нè поттикнува да работиме повеќе и подобро, рече Кирицис.

Тој додава дека „Делез" има намера да остане на српскиот пазар, бидејќи Србија за оваа компанија претставува стратешки пазар, со голем потенцијал за пораст. Најдобар доказ за тоа е изградбата на новиот дистрибутивен центар во Стара Пазова.

Кирицис оценил дека е многу задоволен од тргувањето во Србија, но „Делез" не успеал да ги оствари очекуваните резултати, поради кризата во којашто се наоѓа земјата. Сепак постигнавме пораст, на овој пазар сме лидери и задоволни сме, оценува тој.

„Делез" во моментов има околу 11.000 вработени и тргува со 380 малопродажни објекти, од рангот на „Макси супермаркет", „Мини Макси", „Темпо", „Темпо Експрес" и „Шоп & Гоу".