„Бинго“ сака да го преземе „Конзум“

Трговскиот синџир „Бинго" е заинтересиран да ја преземе трговската мрежа на „Конзум" во Босна и Херцеговина, во што е поддржан од банка од Саудиска Арабија која е веќе присутна во земјата, пишува хрватскиот весник „Вечерњи лист".

Како што наведува весникот, повикувајќи се на свои извори, такво писмо со намери веќе пристигнало во управата на концернот „Агрокор", во чиј состав е „Конзум" - БИХ.

Според најавите на  извршниот полномошник на владата на Хрватска за „Агрокор", Анте Рамљак, наведува весникот, во септември би можело да се очекува раздружување на „Меркатор" и „Конзум".

По раздвојвуањето, ако „Конзум" отиде во стечај, би се отворила можност обврските да ги преземе банката од Саудиска Арабија, пишува „Вечерњи лист".

Во средината од јули, „Бинго" презеде еден од објектите на „Конзум" во Зеница.

„Бинго" е најголемиот трговски синџир во БИХ, чиј сопственик е тузланскиот претприемач Сенад Џамбиќ, кој, почнувајќи од 2014 година, успеа да ги преземе малопродажните објекти на француски „Интермарш" и словенечки „Туш" при нивното повлекување од босанско-херцеговскиот пазар.