Балажич останува директор на „Меркатор“

Надзорниот одбор на словенечкиот трговски синџир „Меркатор" за директор со нов петгодишен мандат го именува Тони Балажич, кој на таа положба беше последните неколку години, соопштија од „Меркатор".

Балажич како претседател на Управата ќе биде одговорен за работењето на компанијата во Словенија, Србија и Црна Гора, на пазарите каде што словенечкиот трговски синџир и понатаму работи под своето име, додека продавниците „Меркатор" во Хрватска и БиХ ги презема „Конзум", пренесува „Сибиз".

Во согласност со купопродажниот договор, според кој „Агрокор" стана сопственик на „Меркатор", во Надзорниот одбор од неодамна повеќето членови се претставници именувани од страна на концернот „Акгрокор". Надзорниот одбор разреши четири досегашни членови на управата во компанијата. Управата сега ја сочинуваат Балажич, Дарко Кнез, претседателката на Собранието на вработените Весна Стојановиќ и Ненад Филиповиќ од бизнис училиштето „Блед", како независен експерт. Филиповиќ воедно е претседател на Надзорниот одбор.