„Агрокор“ работи на нов бизнис-модел

„Агрокор" соопшти дека менаџментот на хрватската компанија, заедно со клучните инвеститори, работи на нов бизнис-модел и истакнува дека позицијата и постоењето на компанијата не се доведуваат во прашање.

Како што пренесува хрватската новинска агенција ХИНА, поради различните информации, од кои голем дел биле нецелосни и невистинити, „Агрокор" решил да се огласи преку медиумите.

Менаџментот на компанијата, заедно со клучлните инвеститори, работи на репозиционирање на системот и на нов бизнис-модел, кој ќе ги заштити интересите на сите акционери, првенствено водејќи сметка за вработените и за нивните работни места, како и за доставувачите и за партнерите, кон кои, „Агрокор" ги исполнува сите преземени обврски, се наведува во соопштението.

Како што се наведува, одбраниот модел наскоро ќе им биде претставен на сите клучни партнери и на вработените.

За „Агрокор" ќе биде прифатлив само тој модел, што нема да биде на штета на вработените и на доставувачите и целосно ќе ги штити нивните интереси, а ќе биде во согласност и со инвеститорите, стои во соопштението.