„Агрокор“ објави понуда за преземање на „Конзум“

Концернот „Агрокор" на Загрепската берза ја објави понудата за преземање на трговскиот синџир „Конзум", што работи во рамките на овој концерн.

Како што се наведува, „Агрокор" понуди 148 куни по акција (19,7 евра), што е за 3 куни повеќе од досегашната понуда на „Агрокор", и за 4,18 куни повеќе од просечната цена на акцијата на „Конзум" остварена на берзата во последните три месеци.

„Агрокор" во понудата за преземање на „Конзум" настапува заедно со „Јамница", компанија што исто така работи во рамките на концернот, чиј заеднички удел во „Конзум" изнесува 86,85 отсто.

Во понудата за преземање се наведува дека стратешките планови на „Агрокор" во однос на „Конзум" нема да се менуваат, туку дека продолжува стратегијата за ширење на малопродажното работење во Хрватска и во регионот, со посебен акцент на пазарите во Србија и БиХ.