„Алкалоид“ донираше 170.000 евра на болницата во Кавадарци

„Алкалоид“ АД Скопје донираше 10.500.000 денари (170.000 евра) на Општа болница со проширена дејност во Кавадарци, комплетно опремувајќи го интерниот оддел за женски болести.

Просторот од над 350 квадратни метри, кој речиси три децении стоеше незавршен, официјално беше предаден во употреба од страна на министерот за здравство Венко Филипче, генералниот директор и претседател на Управниот одбор на „Алкалоид“, Живко Мукаетов и директорот на болницата, д-р Диме Коцев.

Новото одделение се состои од дел за престој на пациентите, дел за интензивна нега и дел за медицински персонал, а целиот простор доби и нови инсталации и соодветна болничка опрема.

Мукаетов рече дека оваа донација е спроведена под закрила на фондацијата „Трајче Мукаетов“.

Иако поводот за посета е пуштање во работа на само еден оддел од оваа болница, која претставува исклучителен пример за функционирање на јавното здравство, ние како компанија ќе ја продолжиме нашата поддршка тука во Кавадарци, рече Мукаетов.

Оваа болница опслужува близу 100.000 граѓани од Повардарскиот регион  што ги опфаќа Кавадарци, Неготино, Росоман и Демир Капија.