Цените ќе замрзнат, ќе се забрани акциска и промотивна продажба во маркетите до 30 ноември

Министерството за економија предложи да се забрани да се нуди акциска и промотивна продажба од страна на сите синџири на трговци во државата до 30 ноември, а од следната недела ќе предложи и замрзнување на цените на производите во прехранбената индустрија.

Тоа,според министерот за економија Крешник Бектеши, ќе доведе до линеарно намалување на цените за минимум 10 отсто. Трговците, како што кажа Бектеши, нема да знаат со кој датум ќе бидат замрзнати цените и на тој начин нема да можат да ги поскапат производите.

Сите анализи покажуваат дека нема основ за зголемување на цените на основните прехранбени производи и од страна на трговците, но и од страна на производителите, имајќи го предвид намалувањето на цените на светските берзи, рече Бектеши по денешниот работен состанок со раководителите на подрачните одделенија на Државниот пазарен инспекторат.

Според него, иако има намалување на инфлацијата согласно согледувањата на Министерството за економија има уште простор за да се намалат цените и сите завршни сметки на големите синџири на маркети покажуваат дека тие немаат намалување на нивните приходи, туку напротив имаат зголемување за претходната година.

Извор: МИА