„Алкалоид“ ќе дава месечен додаток од по 1.000 денари за децата на вработените

Бенефиции за децата на вработените, преку финансиска партиципација на компанијата во износ од по 1.000 денари од дете на вработен на месечно ниво, наменети за доедукација од областа на странските јазици, курсевите за компјутери, спортски и рекреативни активности, како и на активностите од областа на науката и на културата, во текот на целата учебна година вклучува најновиот проект што го промовираше „Алкалоид“ АД Скопје.

Во проектот се опфатени деца од сите категории на вработените во „Алкалоид“  – деца од предучилишна возраст и оние кои се редовно запишани во основно и во средно училиште.

Во процесот на иницирање на овој нов проект бевме фокусирани на повисока цел – нашите деца, кои се нашата иднина. Сакавме да поттикнеме практикување воншколски активности и ангажмани, кои, како дополнителни вредности и знаења, активно ќе придонесат за нивно формирање во комплетни личности, кои во иднина ќе дадат свој личен придонес за унапредување на средината во која живеат и дејствуваат. Преку грижата за нашите вработени и преку иницијативите за овозможување придобивки за членовите на нивните семејства ги манифестираме клучните вредности на големото алкалоидово семејство – ‘Луѓето пред сѐ’ – максима која особено ги засега најмладите, изјави Живко Мукаетов, генерален директор и претседател на Управниот одбор на „Алкалоид“. 

Во моментов компанијата има 408 администрирани пријави за бенефиции за деца на вработените, од кои 33 пријави за деца од предучилишна возраст, 327 пријави за деца од основно училиште и 48 пријави за деца на вработени запишани во средно училиште. Гледано според категории, шест се пријави за компјутерски вештини, седум пријави за активности од областа на науката, 127 пријави од областа на спортот и на рекреативните активности, 234 пријави за курсеви за странски јазици, 30 пријави за танцови школи и по две пријави за активности од областа на културата и на музиката, со очекување и овие бројки да растат.

Човечките ресурси се еден од најцврстите столбови на 85-годишниот раст и развој на алкалоидовата успешна приказна, а грижата за вработените е еден од врвните приоритети на компанијата. Во базата на „Алкалоид“ во Скопје има над 2.000 вработени, па посебен предизвик, како и во секоја успешна и амбициозна компанија, е да се одржи високото ниво на организациска култура, фокусот на резултати и високото ниво на етички вредности, особено во услови на функционирање исполнети со голем број непредвидливи економски, политички и пандемиски аспекти, соппштија од компанијата.