Е-продажба: Како до квалитетна содржина?

Кога зборуваме за создавање содржина за е-канал на продажба, мислиме на креирање, одржување, управување и дистрибуција на содржини со висок квалитет, преку кои ќе ги претставиме производите во овој канал.

Пишува: Дарко Васелиќ, менаџер за бизнис-развој за Словенија, Хрватска и БиХ во „Џонсон & Џонсон“

Во претходните два броја на InStore пишуваме за основните чекори што треба да се направат при лансирањето онлајн-канал за продажба. Заклучивме дека основните чекори што треба да ги следат производителите пред да почнат со е-продажба се следниве четири:

• Да ги изберат брендовите што сакаат да бидат присутни кај онлајн-трговците;
• Да знаат кои се конкурентите во каналот за е-продажба, односно кои стратегии и тактики ги користат;
• Да создадат содржина преку која сакаат да ги претстават производите;
• Да изберат онлајн-продавници во кои сакаат да ги активираат е-понудите.

Во претходните два текста беа разработени првите два чекора, а сега продолжуваме со третиот. Кога зборуваме за создавање содржина за е-канал на продажба, мислиме на креирање, одржување, управување и дистрибуција на содржини со висок квалитет, преку кои ќе ги претставиме производите во овој канал.

Прва компонента за создавање содржина е правилно креирање на називот на производот. Иако се чини банално, тоа е многу важно со оглед на тоа што називот на производот ги одредува резултатите од пребарувањето на интернет. Ако називот е лошо дефиниран, значително ќе се намалат шансите производот да биде виден. Со тоа е поврзан и фактот што името на производот е првата или втората ставка што ја гледа купувачот, односно тоа што треба да му го привлече вниманието. Добро дефинираното име сугерира дека купувачот ќе биде заинтересиран и понатаму да истражува што се наоѓа зад тој назив. Со оглед на тоа што времето на задржување на вниманието во дигиталниот свет е извонредно кратко, вистинското дефинирање на називот станува уште поважно.

Следна компонента е опис на производот, преку кој на потенцијалните купувачи сакаме да им дадеме доволно детали за производот за да се одлучат да го купат. Тоа се тие неколку реченици или параграфи преку кои сакаме да бидеме извонредни во претставувањето на производот. Врз основа на податоците, верувањата и емоциите што ќе ги изнесеме тука, купувачот ќе процени дали може да се идентификува со производот. Многу важно за овој дел е да биде реалистичен, но и инспиративен и мотивирачки. Доколку бидат изнесени работи што не се точни, ќе имаме незадоволни купувачи и голема стапка на поврат, бидејќи во овој дел сме изградиле очекувања кај купувачите што не можеме да ги оправдаме. Ако се случи тоа, многу негативно ќе влијае врз работењето. Доколку описот не биде доволно мотивирачки, конверзијата на посетителите во купувачи ќе биде мала, што исто така негативно ќе се одрази врз продажбата. Важноста на описот на производот можеби најдобро е претставена со податокот дека секоја трета е-кошница не се реализира поради недостигот во описот на производот.

Следната компонента на која треба да ѝ се посвети повеќе внимание е создавањето квалитетни фотографии на кои ќе бидат претставени производите. Секако, кај некои категории и производи фотографиите се поважен елемент и треба да ги има повеќе, а кај други се помалку важни и може да ги има помалку. Сепак, не постои ниту една категорија во онлајн-продажбата што не бара професионално и квалитетно направени фотографии. Освен фотографиите од производите и од пакувањата, се препорачуваат и фотографии со клучни маркетиншки пораки, поврзани со производот. Добар пример за тоа е претставувањето на брендот Listerine на „Амазон“. На сликата можат да се видат 2 фотографии од производот (предната и задната страна), 4 фотографии со клучни маркетиншки пораки и 1 видео. Истражувањата покажуваат дека секоја четврта е-кошница не се реализира поради недостигот на содржина во секциите за фотографии.

Во рамките на креирањето содржина (иако со тоа не се завршува целата листа за креирање содржина), следна компонента е секцијата „оцени и прегледи“ (Ratings & Reviews). Ако знаеме дека довербата на купувачот во онлајн-каналот не се подразбира, туку треба да се стекне, сфаќаме колку е важно производите да имаат позитивни коментари од купувачите што го купиле тој производ. Доволен број позитивни и помал број негативни коментари ја зголемуваат шансата купувачите да решат да купат. Истражувањата покажуваат дека секоја четврта е-кошница не се реализира поради недоволниот или малиот број оцени.

Одржувањето подразбира секојдневно ажурирање на содржината. Сите што сме во FMCG-секторот знаеме колку често се менуваат различните ставки што ги одредуваат производите: пакувања, состав и рецептури, логистички податоци, цени, маркетиншки пораки и материјали, контакт-податоци итн. Сите тие податоци треба во секој момент да се ажурираат, што не е баш лесна задача. Особено ако знаеме дека поголемите компании во оваа индустрија имаат повеќе од 100 производи, поделени во повеќе категории и брендови.

Под управување со содржината се мисли првенствено на дефинирање и извршување на улогите поврзани со формирањето и креирањето содржини, нивно ажурирање, периодична проверка, споделување содржини со заинтересирани страни и сл.

Дистрибуцијата на содржината подразбира споделување на содржините, првенствено со е-трговците. Тоа значи систематски пристап на промена на содржина секогаш кога на страницата на сопственикот ќе дојде до нејзино ажурирање. Еден од напредните начини за дистрибуција е симнување содржина на оптимизирана платформа, каде што ќе се складира. Софтверот eRetail Content на грчката „Конверт груп“ е добра алатка за голем број опции поврзани со содржината што е потребна за е-продажба.

Толку за третиот чекор за воспоставување онлајн-канал за продажба.

Останете безбедни!

Извори:

www.kantarretailiq.com

www.nielsen.com

www.convertgroup.com

www.stackline.com

www.statisa.com