Еуромонитор: Технолошки иновации во малопродажбата (прв дел)

Ковид-19 ја забрза дигиталната трансформација во малопродажната индустрија. Покрај зголемувањето на можностите за подобро опслужување на потрошувачите преку интернет-каналите, трговците инвестираа и во технологии во продавницата.

Извор: „Еуромонитор интернационал“

Во текот на последната деценија потрошувачите ги прифатија и се навикнаа на технологиите во малопродажбата. Зголемената зависност од технологијата стана многу поочигледна за време на пандемијата бидејќи трговците и брендовите се обидуваа да останат поврзани со потрошувачите во услови кога проширувањето на вирусот ги засили безбедносните грижи.

Ковид-19 ја забрза дигиталната трансформација во малопродажната индустрија. Покрај зголемувањето на можностите за подобро опслужување на потрошувачите преку интернет-каналите, трговците инвестираа и во технологии во продавницата. Речиси три четвртини од трговците велат дека кризата забрзала некои, ако не и сите, инвестиции во технологијата (Гласот на индустријата: Дигитално истражување).

Во соработка со Националната федерација за малопродажба, „Еуромонитор“ го изработи овој извештај, во кој истражува како се промени односот на дигиталните купувачи кон технологијата во текот на пандемијата. Извештајот им дава увид на трговците и на брендовите каде треба да направат технолошки инвестиции сега и во наредните години. Организиран е во пет аспекти: истражување преку интернет; онлајн-купување; пазарување во продавница; плаќање; испорака/преземање.

Способноста за виртуелно поврзување со потрошувачите на дигиталните платформи го претвори статичкото онлајн-искуство во мултисензорно, доловувајќи ги емоциите што најчесто се поврзуваат со личните интеракции.

1. ИСТРАЖУВАЊЕ ПРЕКУ ИНТЕРНЕТ

Пандемијата го пренасочи начинот на кој купуваат потрошувачите. Иако популарноста на е-трговијата се зголемува, таа во голема мера има само трансакциска улога, а физичките продавници остануваат примарна можност за доживување на брендот и интеракција со производот. Продавниците и понатаму ќе бидат клучен канал за пазарување во иднина, но периодот на пандемијата го истакна потенцијалот на дигиталниот канал, кој ќе има сѐ поголема улога во идното купувачко искуство.

Способноста за виртуелно поврзување со потрошувачите на дигиталните платформи го претвори статичкото онлајн-искуство во мултисензорно, доловувајќи ги емоциите што најчесто се поврзуваат со личните интеракции. Трговците и брендовите користат дигитални платформи, аугментирана (АР) и виртуелна реалност (ВР), пренос во живо... за да ги доловат елементите од личното купувачко искуство.

Однесување и мотивација на потрошувачите

Еден од начините да се создаде физичко доживување во дигиталниот канал е преку експериментални виртуелни искуства. На глобално ниво, тие искуства се најизразени кај милениумците и кај потрошувачите од земјите во развој.

Зголемената употреба на АР и ВР има потенцијал да ги подобри визуелните сигнали на искуството при онлајн-купување. Иако овие технологии комерцијално се достапни со години, 58% од дигиталните купувачи на глобално ниво велат дека досега не ги користеле.

Иако виртуелните искуства беа искористени за да поттикнат ангажман на потрошувачите во текот на карантинот, тие најверојатно ќе станат вообичаени во постпандемската ера.

Преносот во живо, кој се здоби со популарност во последниве години, сѐ повеќе се користеше во текот на кризата поради неговата способност да создаде емоционална врска. Со комбинација на елементи од преносот во живо, социјалните медиуми и славните личности, продажбата во живо стана популарна низ целиот свет, како начин брендовите да се поврзат со потрошувачите во карантин.

Фокус на потрошувачот

Во истражувањето спроведено во март годинава, речиси 30% од дигиталните купувачи изјавиле дека преку пренос во живо купиле нешто во последниот месец. На глобално ниво, дигиталните купувачи велат дека главните причини поради кои учествуваат во „трговијата во живо“ се за да добијат попусти и повеќе детали за производот или услугата пред купување. Облеката и декоративните додатоци се на врвот на листата на тие што направиле набавка.

Интересот за овој нов канал за продажба е најголем кај потрошувачите на возраст од 21 до 34 години, достигнувајќи врв кај возрасната група од 30 до 34 години (46%). Како нација, Кина е водечка со 63% од дигиталните купувачи што купиле преку пренос во живо во последниот месец. Таа бројка е помала на другите пазари – 29% во САД, 28% во Бразил и 18% во Велика Британија.

Додека концептот се развиваше во Кина и пред пандемијата, продажбата во живо во 2020 година се зголеми поради ограничувањата на личните интеракции. Оттаму, „трговијата во живо“ продре и во другите земји од Азиско-пацифичкиот Регион, а потоа се пресели на Запад. Во 2020 година е-гигантот го воведе „Амазон лајв“ за инфлуенсери, а „Фејсбук“ додаде можности за пренос на живо на истоимената платформа и на „Инстаграм“.

Перспектива на индустријата и инвестиции

За компаниите, дигиталниот канал стана стандарден и клучен за интеракција со потрошувачите. Околу 57% од експертите за малопродажба го сметаат дигиталниот ангажман за врвен тренд што влијае врз развојот на е-трговијата.

Бизнисите експериментираат со импресивни виртуелни искуства за продажба на производи, од облека и козметика до мебел, со цел да ја зголемат интеракцијата и да ги намалат стапките на поврат. Овие виртуелни искуства се на високо ниво на софистицираност. Голем дел од трговците нудат различни услуги: консултации преку интернет, виртуелни часови и трговија во живо, со кои ги поврзуваат потрошувачите со брендот. Други одат дотаму што го имитираат искуството од физичкиот допир и тестирањето на производот со помош на АР и ВР.

Изгледи

Иако виртуелните искуства беа искористени за да поттикнат ангажман на потрошувачите во текот на карантинот, тие најверојатно ќе станат вообичаени во постпандемската ера, бидејќи дигиталното ќе стане стандарден канал за истражување на брендот.

Добивањето виртуелна вредност во голема мера ќе зависи од тоа колку добро технологијата може да ги претстави најзначајните атрибути на брендовите за потрошувачите, во одреден контекст. Со оглед на тоа што овие атрибути се разликуваат по индустрија и категорија, ќе има многу пресвртни точки бидејќи технологиите што ги овозможуваат овие виртуелни искуства стануваат сѐ почести.

Пандемијата покажа колку брзо може да се развива општеството. За време на оваа пресвртница, бизнисите ги префрлија приоритетите за понатамошен развој на виртуелните можности, намалувајќи ги бариерите за истражување, откривање и купување преку дигиталниот канал.

Добивањето виртуелна вредност во голема мера ќе зависи од тоа колку добро технологијата може да ги претстави најзначајните атрибути на брендовите за потрошувачите, во одреден контекст.

2. ОНЛАЈН-КУПУВАЊЕ

Според процените на „Еуромонитор“, е-продажбата на глобално ниво во 2020 година се зголеми за 25%. Иако се очекува годишната стапка на пораст да се намали, е-трговијата ќе го продолжи да биде најбрзорастечки канал за набавка. Проекциите на „Еуромонитор“ се дека е-трговијата ќе има 51-процентен удел во порастот на малопродажната индустрија на глобално ниво од 2020 до 2025 година.

Однесување и мотивација на потрошувачите

Откако голем број физички продажни места беа привремено затворени, многу потрошувачи првпат почнаа да купуваат преку интернет.

Возрасната група од 30 до 44 години најмногу влијаеше врз порастот на бројот на дигитални купувачи, додека групата над 60 години најмногу придонесе за зголемувањето на бројот на нови корисници во фазата на истражување преку интернет.

Постојните корисници на е-трговија, исто така, ја зголемија фреквенцијата на купување преку интернет. Кризата ги поттикна дигиталните купувачи да купуваат поширок спектар на производи и услуги.

Категоријата прехранбени производи

На глобално ниво, продажбата на прехранбени производи преку интернет забележа значителен поттик во 2020 година. За да се исполни зголемената побарувачка, малопродажните трговци ги зголемија дигиталните инвестиции, а активностите на брендовите ги насочија директно до потрошувачите. Во 2020 година е-трговијата со прехранбени производи и пијалаци се зголеми за 84 милијарди американски долари и забележа пораст од 51%, највисок од кој било друг сегмент на производи. Експанзијата беше предводена од САД, пазар кој објави најголема апсолутна вредност и троцифрен процентуален пораст.

Најверојатно, потрошувачите почесто ќе ги посетуваат физичките продавници по имунизацијата, но прогнозите се дека, сепак, е-трговијата со прехранбени производи и пијалаци годинава ќе забележи пораст од 8%. За да преживеат во овој променлив конкурентен пејзаж, трговците со прехранбени производи ќе треба да ѝ дадат приоритет на оперативната ефикасност.

Миграцијата кон дигиталниот канал ќе доведе до пораст на „продавниците во сенка“ (dark stores, односно дистрибутивни центри што личат на конвенционален маркет, но се затворени за потрошувачите и се користат за складирање и организирање на нарачките преку интернет) и центрите за автоматска испорака. Тоа се дел од начините со кои трговците ќе ги намалат дополнителните трошоци за продажба преку интернет.

Можностите за бесконтактна наплата беа првите карактеристики што дигиталните купувачи ги издвоија за подобрување на искуството при пазарувањето во физички продавници.

Перспектива на индустријата и инвестиции

Трговците и брендовите сѐ повеќе се потпираат на технологијата за да ги привлечат и ангажираат потрошувачите што повеќе време поминуваат дома. Околу 73% од трговците изјавија дека ги зголемиле инвестициите во технологии поради ковид-19. Речиси половина од нив ја прошириле употребата на мобилни апликации и платформи. Другите инвестиции на трговците вклучуваат развој на омниканалната оперативност.

Изгледи

Иако е-трговијата е најбрзорастечкиот канал во последните 15 години, сепак, кризата беше клучен акцелератор за промените. Ковид-19 донесе многу нови потрошувачи на интернет, а тие што веќе купуваа онлајн, ги поттикна да прават повеќе набавки од поширок спектар на производи и услуги.

Дигиталните купувачи ја намалија фреквенцијата на посети на физичките продавници. Од јануари 2020 година до март 2021 година, процентот на потрошувачи што изјавиле дека пазаруваат на дигиталните канали оствари двоцифрен пораст, додека кај физичките канали забележа едноцифрен пад. Продавниците ќе останат важен канал за купување, но, сепак, тековните мерки за физичка дистанца ќе ја зајакнат поврзаноста на потрошувачите со дигитални платформи и алатки.

Континуираниот пораст на е-трговијата ќе ја доведе во прашање основната цел на офлајн-каналот, предизвикувајќи ги трговците да ја преиспитаат улогата на продавницата во дигиталната ера.

3. ПАЗАРУВАЊЕ ВО ПРОДАВНИЦА

Улогата на продавниците се менува, при што пандемијата само ја зголеми потребата трговците да преиспитаат како да ги користат расположливите средства во иднина. Иако во последната година големо внимание беше посветено на бумот на е-трговијата и миграцијата од продавниците, физичките продажни места ќе останат круцијален дел од купувањето. Прогнозите се дека 76% од стоките ќе се купуваат во продавница во 2025 година, во споредба со 2020 година, кога таа цифра изнесуваше 81%.

Однесување и мотивација на потрошувачите

Кога станува збор за купување производи во физичките продавници, дигиталните купувачи изјавиле дека сакаат да бидат мотивирани за да посетат одреден трговец.

Не е изненадувачки фактот дека технолошките искуства што го намалуваат физичкиот контакт беа најмногу прифатени од потрошувачите во текот на минатата година. Голем дел од испитаниците изјавија дека технологиите за препознавање лице, виртуелните простории и бесконтактната наплата се значајна додадена вредност за нивното пазарување во продавницата.

Категоријата прехранбени производи

Во годината кога малопродажбата се соочи со невидени предизвици, продавниците за храна имаа бенефит од побарувачката за основни производи.

Можностите за бесконтактна наплата беа првите карактеристики што дигиталните купувачи ги издвоија за подобрување на искуството при пазарувањето во физички продавници. Речиси 40% од нив посочуваат дека технологиите „scan & go“ и „walk in – walk out“, како и паметните колички, се опции што најмногу би го подобриле нивното искуство во продавницата.

Перспектива на индустријата и инвестиции

И покрај вниманието посветено на е-трговијата во 2020 година, 21% од глобалните трговци веруваат дека ковид-19 ги забрза и иницијативите за подобрување на искуството во продавницата. Постојат неколку технологии што трговците можат да ги искористат во иднина за да го подобрат купувањето, почнувајќи од роботика и виртуелна реалност до 5Г-мрежи.

Импресивните искуства базирани на технологија најверојатно ќе се зголемат кога потрошувачите почесто ќе ги посетуваат продавниците. Од глобалните трговци анкетирани во ноември 2020 година, 45% сметаат дека АР и ВР ќе доведат до пософистицирани искуства за персонализирани купувања во следните пет години.

Изгледи

Продавниците ќе играат круцијална улога во иднината на малопродажбата, но овие физички простори се епицентар на големите промени. Континуираниот пораст на е-трговијата ќе ја доведе во прашање основната цел на офлајн-каналот, предизвикувајќи ги трговците да ја преиспитаат улогата на продавницата во дигиталната ера.

Трговците на мало што продаваат повеќе производи за широка потрошувачка ќе треба да ја земат предвид улогата што овој физички простор ќе ја има за исполнување на нарачките за е-трговија. Технологијата ќе игра клучна улога во реализацијата на новоосмисленото искуство во продавницата (продолжува).