„МОЛ група“ на својата локација во Алѓо, Унгарија, пушти во употреба нов соларен парк со моќност од 37,4 MWp и придружен систем за складирање електрична енергија со номинална моќност од 20 MW и капацитет од 40 MWh. Со овие постројки групацијата дополнително го зајакнува своето портфолио на обновливи извори на енергија во регионот на Централна Европа и енергетската независност на сопственото работење, истовремено зголемувајќи ја флексибилноста во снабдувањето со електрична енергија и намалувајќи ги емисиите на CO2 за приближно 13.000 тони годишно.
„Неодамнешните искуства укажаа на значењето на управувањето со осцилациите во производството на електрична енергија во текот на денот. Токму тоа го постигнуваме со пуштањето во употреба на нашата најнова постројка за складирање енергија. Оваа инвестиција истовремено придонесува за одржливоста, сигурноста на снабдувањето и економската конкурентност: зелената електрична енергија произведена од сопствени извори ја намалува нашата зависност од снабдување со енергија од надворешни извори, додека батерискиот систем за складирање придонесува за стабилноста на националната електроенергетска мрежа“, изјави Ѓерѓ Бача, главен директор за стратегија на „МОЛ група“.
Новиот соларен парк, заедно со постојните електрани во Алѓо, може целосно да ги задоволи потребите за електрична енергија на работењето на компанијата во овој регион. Соларната постројка со моќност од 37,4 MWp ја зајакнува енергетската независност на локацијата и ги намалува оперативните трошоци преку замена на електричната енергија набавена од надворешни извори. Годишното производство на соларната електрана одговара на годишната потрошувачка на електрична енергија на приближно 22.500 домаќинства во жупанијата Чонград-Чанад, каде што се наоѓа локацијата на компанијата.
Батерискиот систем за складирање енергија, со номинална моќност од 20 MW и капацитет од 40 MWh, инсталиран во рамките на оваа инвестиција, придонесува за балансирање на осцилациите во мрежата предизвикани од обновливите извори зависни од временските услови. Системот може да складира и повторно да испорача во мрежата количество електрична енергија што одговара на годишната потрошувачка на приближно 7.300 просечни домаќинства во оваа жупанија.
Паметната енергетска транзиција е еден од клучните столбови на долгорочната стратегија на групацијата, наречена SHAPE TOMORROW. Проширувањето на капацитетите за производство на енергија од обновливи извори и развојот на системите за складирање енергија се од клучно значење за остварување на оваа цел, бидејќи со осцилациите во производството на постројките зависни од временските услови, како соларните паркови и ветерните електрани, потребно е да се управува на национално ниво. Поради тоа, проектот во Алѓо придонесува и за декарбонизација на работењето на компанијата и за зголемување на флексибилноста на унгарскиот електроенергетски систем.
Соларниот парк го изгради компанијата „АЛТЕО“, која по завршувањето на проектот би можела да обезбедува и услуги за агрегација. „МОЛ група“ и нејзините партнери поседуваат 73,8% удел во „АЛТЕО“, која управува со постројки за производство на енергија од обновливи извори со вкупна моќност од приближно 115 MW, вклучувајќи ветерни, соларни и хидроелектрани, како и постројки на биогас.
Групацијата континуирано го проширува своето портфолио на обновливи извори на енергија во Унгарија и низ регионот. Целта на компанијата е да го зголеми уделот на електрична енергија од обновливи извори што ја користи во сопственото работење, со што ја зајакнува сигурноста на снабдувањето, ја намалува зависноста од надворешни извори и придонесува кон остварувањето на своите цели за декарбонизација.
Со пуштањето во употреба на новата постројка, групацијата сега управува со девет соларни паркови во Унгарија, со вкупна моќност од 405 MW, а планира и понатамошно проширување на портфолиото. Компанијата управува и со две постројки за складирање енергија со вкупен капацитет од 80 MWh. „МОЛ група“ планира до 2030 година во Унгарија да инсталира капацитети за складирање енергија од вкупно 500 MWh.
„МОЛ група“ управува и со два соларни парка во Хрватска, со вкупна моќност од 10 MW, додека следната година треба да биде изграден и трет, со што вкупниот капацитет ќе се зголеми на 23 MW.
Со новите постројки пуштени во употреба, вкупниот фотоволтаичен капацитет на компанијата во регионот достигна 415 MWp, придонесувајќи за годишно намалување на емисиите на CO2 за приближно 160.000 тони.
