Цените во Германија од 1985 година пораснале 120%, а пивото на Октоберфест 400%

Во сабота започнува Октоберфест, глобално најпознатиот фестивал на пивото. Познатата литарска кригла ќе чини само нешто повеќе од минатата година, но долгорочната споредба многу подобро ја илустрира инфлацијата, пишува dpa.

Посетителите на претстојниот фестивал за една кригла пиво во просек ќе плаќаат 15,61 евро, односно 2,4% повеќе од минатата година. Ова зголемување е пониско од стапката на општата инфлација.

Сепак, истата кригла ќе чини петпати повеќе од 1985 година, кога нејзината цена изнесувала 3,20 евра, што претставува раст од 400%, посочи во својот блог главниот економист на „Уникредит банка“ во Германија, Андреас Рес.

Ова поскапување значително ја надминува општата стапка на раст на цените во Германија во изминатите четири децении, која изнесува околу 120%, наведува Рес.

Тој го поставува и прашањето дали овогодишното поскапување на пивото, кое е под стапката на инфлација, претставува сигнал дека Октоберфест ја преминал точката во која повисоките цени почнуваат посилно да влијаат врз намалувањето на побарувачката.

Според него, можно е врвот на „Октоберфест-инфлацијата“ веќе да е поминат. Сепак, економистот додава дека веројатно никој не би требало со сигурност да се обложи на такво сценарио.

Податоците за цените на пивото Рес ги добил од Заводот за статистика на Минхен.