Македонската групација на меѓународни шпедитери и логистички оператори – „МИФА“ годинава за првпат е партнер на LOGISTICS EXPO – TRUCK & VAN EXPO 2026, еден од позначајните регионални саеми посветени на логистиката, транспортот и синџирите на снабдување. Настанот ќе се одржи од 16 до 18 октомври 2026 година во Меѓународниот саемски и конгресен центар во Солун, Грција.
Во услови кога глобалната трговија и логистичките текови минуваат низ значајна трансформација, Солун сè повеќе ја зацврстува својата позиција како важен логистички центар за Балканот и Југоисточна Европа.
„МИФА“ на саемот ќе учествува со своја делегација, која ќе ги следи активностите и ќе оствари средби со претставници на логистички компании и партнери од регионот. Групацијата ќе биде дел и од LOGI.C Conferences, конференциската програма што ќе се одржува паралелно со саемот.
Како говорник на конференцијата ќе настапи и претседателот на „МИФА“, Карло Змајшек, кој ќе има можност да ги претстави искуствата и перспективите на македонскиот транспортен и логистички сектор пред меѓународна публика.
LOGISTICS EXPO THESSALONIKI 2026 е наменет за компании и професионалци од областа на шпедицијата, 3PL и 4PL услугите, транспортот, магацинското работење, управувањето со возни паркови, ИТ-решенијата и автоматизацијата на синџирите на снабдување.
Настанот овозможува директни средби со регионални B2B партнери, добавувачи и купувачи, како и можност за воспоставување нови деловни соработки и проширување на активностите на компаниите на пазарите во регионот.
Посетителите ќе можат да се запознаат и со најновите WMS и TMS системи, решенијата за предвидување на побарувачката со помош на вештачка интелигенција, IoT-технологиите за следење на пратки и возила, како и со современи алатки за автоматизација на логистичките процеси.
Посебен акцент ќе биде ставен и на електрификацијата на комерцијалните и тешките товарни возила, ефикасниот прекуграничен транспорт и решенијата за „last-mile delivery“.
Меѓу главните категории што ќе бидат претставени на саемот се напредни решенија за логистика и управување со синџири на снабдување, шпедиција, 3PL и 4PL услуги, поморски и воздушен карго-транспорт и прекугранични транспортни мрежи.
Во делот на интралогистиката ќе бидат претставени паметни магацински системи, автоматизирани возила со навигација – AGV, системи за сортирање и современи решенија за пакување.
На саемот ќе бидат изложени и комерцијални и професионални возила, електрични комбиња, тешки товарни возила и решенија за испорака до крајниот корисник.
Значаен сегмент ќе бидат и ИТ-решенијата од новата генерација, вклучително WMS и TMS софтвер, аналитика базирана на вештачка интелигенција, IoT-уреди и платформи за дигитална безбедност на синџирите на снабдување.
Учеството на „МИФА“ како партнер на годинешното издание претставува можност македонскиот логистички и шпедитерски сектор дополнително да се поврзе со компании од Грција и поширокиот балкански регион, како и да ги следи новите технологии и трендови што го менуваат современиот транспорт и логистика.
