Трговскиот синџир „Волмарт“ го претстави својот извештај за одржливо работење за фискалната 2026 година, со посебен фокус на инвестициите во вработените, поддршката на заедниците и заштитата на природните ресурси.
„Волмарт“ настана врз едноставна идеја – да им помогне на луѓето да заштедат пари и да живеат подобро. Таа цел и денес го насочува работењето на компанијата како малопродажен систем заснован на луѓето, поддржан од технологијата и омниканалниот модел, кој секоја недела опслужува милиони купувачи низ светот. Нашата цел оди подалеку од обезбедување пристап до производи и услуги по пристапни цени. Инвестираме во нашите вработени и развиваме вештини за иднината. Им помагаме на добавувачите и продавачите да стигнат до нови пазари и да го развиваат своето работење. Преку луѓето и технологијата ја унапредуваме одржливоста на нашите операции и синџири на вредност. Секојдневно ги користиме нашите предности за да ја зајакнеме отпорноста на заедниците на кои им служиме, изјави Џон Фурнер, претседател и извршен директор на „Волмарт“.
Во текот на фискалната 2026 година, „Волмарт“ ја исполнил петгодишната обврска за инвестирање една милијарда долари во образование и професионален развој на вработените.
Компанијата ја остварила и целта да им помогне на вработените во САД да преминат на 100.000 барани работни позиции.
Биле започнати и нови програми за развој на кариерата на вработените во продавниците, меѓу кои и програмата Associate to Technician, развиена врз основа на успехот на Associate to Driver. Двете програми им овозможуваат на вработените да преминат на поодговорни и подобро платени работни позиции.
„Волмарт“ продолжил и со инвестициите во платите, бенефициите и програмите преку кои вработените можат да поседуваат акции во компанијата.
Во делот на поддршката на купувачите и заедниците, компанијата проценува дека во текот на фискалната 2026 година им заштедила на потрошувачите околу 1,64 милијарди долари благодарение на пониските цени на свежото овошје и зеленчук.
Во истиот период, „Волмарт“ донирал вкупно 1,97 милијарди долари во парични средства и производи низ светот. Во САД биле донирани 769 милиони фунти храна, главно овошје, зеленчук, месо и млечни производи, на локалните банки за храна, а компанијата дополнително инвестирала и во нивните капацитети за ладење.
Од компанијата наведуваат дека активностите поврзани со одржливоста се насочени кон зголемување на отпорноста на работењето и синџирите на снабдување, подобрување на сигурноста на набавките, поттикнување на иновациите, одржување ниски трошоци и зајакнување на довербата кај засегнатите страни.
Во текот на фискалната 2026 година, апсолутните емисии на стакленички гасови од опсег 1 и 2 биле намалени за 7,5% во однос на претходната година. Во споредба со базната фискална 2016 година, намалувањето достигнало 24,6%.
Интензитетот на оперативните емисии е намален за 11,6% на годишно ниво и за повеќе од 53% во споредба со 2016 година.
Обновливите извори обезбедувале 53,3% од вкупната глобална потрошувачка на електрична енергија на компанијата, со што бил надминат поставениот таргет за 2025 година.
Нашиот ESG-извештај за фискалната 2026 година го прикажува и напредокот што го постигнавме и работата што сè уште е пред нас. Благодарен сум им на вработените, добавувачите, купувачите и партнерите кои секојдневно придонесуваат кон оваа работа и ги повикувам сите заинтересирани да се запознаат со нашите резултати, пристапот кон создавање заедничка вредност и можностите што се пред нас, заклучи Фурнер.
