Американската Агенција за храна и лекови (FDA) предложи промена на правилата според која производителите на храна ќе мора да ја известат агенцијата пред да воведат нови состојки и адитиви во своите производи.
Предлогот има цел да го промени системот стар неколку децении, кој им овозможува на компаниите самостојно да утврдат дека одредена состојка е „општопризната како безбедна“, без обврска за тоа да ја известат FDA или да достават докази за нејзината безбедност.
Преминувањето кон систем на задолжително известување го отстранува повеќедеценискиот јаз во информациите и ѝ обезбедува на FDA сеопфатен увид неопходен за унапредување на безбедноста откако производите ќе бидат пуштени на пазарот, изјави Кајл Дијамантас, вршител на должноста комесар на FDA.
Според предложеното правило, производителите ќе треба да достават документација со научните докази врз основа на кои заклучиле дека новата состојка е безбедна.
FDA ќе треба да ја разгледа пријавата во рок од 180 дена, а доколку утврди потенцијален ризик, ќе може да побара дополнителни информации или од компанијата да побара да го одложи воведувањето на состојката.
Предлогот, сепак, не предвидува задолжително претходно одобрение од FDA за секоја нова состојка.
Претставници на организациите за заштита на потрошувачите го оценија предлогот како чекор напред, но сметаат дека предложените мерки не се доволни. Тие бараат задолжителна независна процена на безбедноста и построги научни критериуми пред новите хемикалии и други состојки да бидат дозволени за употреба во храната.
Тоа мора да вклучува и строги безбедносни стандарди засновани на науката и темелна, независна процена од FDA пред да се дозволи употреба на хемикалии во нашата храна, изјави Мелани Бенеш од непрофитната организација Environmental Working Group.
FDA исто така соопшти дека ја завршила работата на првата федерална дефиниција за „ултрапреработена храна“, но деталите од дефиницијата сè уште не се објавени. Документот е доставен до Белата куќа на понатамошна ревизија.
