„Марс“ ги поддржува младите во прехранбениот и земјоделскиот сектор со три милиони долари

Компанијата „Марс Инкорпорејтед“ (Mars Incorporated) издвои три милиони долари (околу 2,67 милиони евра) преку својот фонд Mars Impact Fund за организацијата National 4-H Council, американска организација посветена на развојот на младите, пренесува ESM Magazine.

Целта на донацијата е да им помогне на младите при изборот на кариера во областите на прехранбената индустрија, земјоделството и ветеринарната медицина.

„Побарувачката за стручни кадри во областа на науката за храна, земјоделството и ветеринарната медицина продолжува да расте и сакаме да бидеме сигурни дека младите имаат можност да ги истражат овие кариерни патишта“, изјави Мишел Грог, извршна директорка на фондот Mars Impact Fund.

Од „Марс“ соопштија дека средствата ќе бидат распределени во период од три години, со поддршка на мрежата Cooperative Extension на организацијата 4-H.

Организацијата соработува со повеќе од 100 државни универзитети, а дел од финансирањето ќе биде насочено и кон посебни програми на шест универзитети.

Донацијата дополнително ќе ја зајакне програмата Beyond Ready, која им помага на младите да се приспособат на светот што брзо се менува.

Исто така, средствата ќе овозможат 20 целосни стипендии за млади учесници во програмата Ignite, преку која ќе имаат можност да истражуваат различни професионални можности и да учествуваат во едукативни обуки.

„Соработката со компанијата „Марс“ ни овозможува вештините потребни за кариера да ги поврземе со конкретни професионални можности и да им помогнеме на поголем број млади да откријат каде можат да ги одведат нивните интереси“, изјави Хедер Елиот, директорка за развој и маркетинг во организацијата National 4-H Council.