Муратовска: Хрватска од следната недела ќе им издава посебни визи на нашите камионџии

Од 23 септември Хрватска ќе дава посебен вид визи за транспортерите од Македонија и од земјите од Западен Балкан за олеснување на транспортот и престојот – изјави Биљана Муратовска од здружението „Макам-транс“.

Сепак, проблемот со правилото 90/180 останува отворен и тој ќе се решава билатерално, со секоја земја од шенген-зоната, вели Муратовска.

Професионалните возачи од Западен Балкан, меѓу кои и македонските, се соочуваат со ограничувањето во земјите од шенген-зоната, каде им е дозволено да престојуваат најмногу 90 дена во период од 180 дена. Ова предизвика големи проблеми во изминатите месеци, а властите и покрај бројните најави, не успеаја да најдат решение.

Министерот за транспорт и врски, Александар Николоски, неодамна најави дека Австрија е следната држава која многу бргу ќе воспостави долгорочни визи за професионалните возачи, уверува министерот за транспорт и врски. Покрај Австрија, се преговара и со Германија, Унгарија и Словенија, а веќе се склучени три такви договори и тоа со Хрватска, Романија и Швајцарија, рече тој.

„Имајќи предвид дека беа препознаени како професионалци, сега може да добиваат долгорочни визи и затоа ние мора да работиме со што повеќе држави да постигнеме ваков договор. Тоа е единственото решение. Има неколку земји членки на шенген-зоната коишто не сакаат да има заедничко решение на сите земји членки. За жал, и визните правила се правила коишто се носат со консензус на ниво на Европска Унија, односно во случајов на шенген-зоната, и затоа решението е билатерално и ние билатерално работиме“, изјави Николоски.