Словенија: „Фортенов“ негира дека планира продажба на „Меркатор“

Групацијата „Фортенова“ за словенечката новинска агенција „СТА“ соопштила дека не се планира продажба на „Меркатор“ или на целата групација, како што пренесе словенечки „Дневник“.

Имено, „Дневник“ објави дека „ЦВЦ Капитал партнерс“, финансиски фонд со седиште во Луксембург, планира да преземе поголем дел од работењето на групацијата, вклучително и „Меркатор“.

Не се точни шпекулациите за продажба на „Меркатор“ и на целата групација „Фортенова“. Со интензивните активности поврзани со новото рефинансирање, групацијата „Фортенова“ моментално е силно фокусирана на оперативно зајакнување на сите делови од своето работење и подобрување на нивната профитабилност, објави групацијата како одговор на наводите на „Дневник“.

Претходно, малопродажниот синџир „Меркатор“ во октомври објави дека планира да затвори голем број продавници за електроника во Словенија. Тогаш беа затворени продавниците во Храстник, Лендава, Метлица, Мурска Собота, Севница, Стари трг, Тржич и Железница.

Исто така, групацијата „Фортенова“ неодамна ја заврши продажбата на својот земјоделски сегмент на групацијата „Подравка“, со што го финализираше процесот на продажба на „Беље“, „Вупик“, „ПИК Винковци“, „Енергија Градец“, „Беље Агро-Вет“ и „Феликс“. „Подравка“ како сопственик на сите компании членки на групацијата „Подравка“ ќе стопанисува со земјоделскиот сегмент преку компанијата „Подравка Агри“. На крајот на минатата година, „Подравка“ и Европската банка за обнова и развој (ЕБОР) потпишаа договор за акционерско вложување од 50 милиони евра во „Подравка Агри“, со што ЕБОР стана партнер во компанијата „Подравка Агри“. Така, „Подравка“ има 84,99% сопственички удел во компанијата „Подравка Агри“, додека ЕБОР поседува 15,01%. 

Извор: SeeNews

Фото: Групација „Фортенова“