Хрватска: „Подравка“ бележи раст на приходите

Во 2024 година, групацијата „Подравка“ оствари приход од продажба од 766,5 милиони евра, што е за 52,7 милиони евра или 7,4% повеќе отколку во 2023 година.

Растот на приходите е забележан и во двата сегменти во кои работи групацијата. Приходите во сегментот „Храна“ се зголемија за речиси 7% и достигнаа 591,6 милиони евра, додека приходите во сегментот „Фармацевтски производи“ и тоа „Белупо“ се зголемени за 9,2% и достигнаа 174,9 милиони евра.

Нето добивката на групацијата во овој период изнесува 73,9 милиони евра, што е зголемување од 11,3% во однос на претходната година.

Резултатите на групацијата во 2024 година произлегуваат од растот на продажбата во двата деловни сегменти, храна и фармацевтски производи. Во храната, каде што речиси 70% од приходите се генерираат на меѓународните пазари групацијата оствари пораст на приходите од извоз од 7,4%, или 28,2 милиони евра. Истовремено, приходите од продажба во Хрватска се зголемени за 5,6% или 9,8 милиони евра.

По растот на приходите од извоз особено се издвојуваат пазарите на Западна Европа, САД и Австралија. Подобрувањето на присуството на пазарот, проширувањето на мрежата на купувачи и сеопфатното редефинирање на ценовните политики резултираа со раст на продажбата во Германија од 57,2%, а во САД, Канада и Австралија од 34,6%. Кај фармацевтски производи, „Белупо“ забележа раст на продажбата на странските пазари од 8%, а во Хрватска од 11%. Вкупната продажба на „Белупо“ во 2024 година е зголемена за 14,7 милиони евра.

Исклучително сме горди на деловните резултати што групацијата „Подравка“ ги постигна во 2024 година, бидејќи постигнавме значителен раст во двата клучни сегменти од нашиот бизнис - храна и фармацевтски производи. Особено сме задоволни од силниот раст на продажбата на сите странски пазари, со извонредни резултати на пазарите во Западна Европа, САД и Австралија. Растот на продажбата на странските пазари е клучен фактор за нашиот севкупен раст бидејќи ни дава дополнителна стабилност, но и перспектива за понатамошен раст на извозот, на што се целосно фокусирани сите наши тимови. Растот на добивката го потврдува успешното управување со бизнисот, кое покрај растот на приходите вклучува и инвестиции во подобрување на условите за работа и материјалните права на нашите вработени. Резултатите во 2024 година претставуваат продолжение на сите претходни напори, како и основа за сето она што допрва доаѓа. Силните инвестиции во технологијата, новите производи и нашиот тим ќе ни овозможат да продолжиме со растот и успехот. Сето она што досега го постигнавме ни овозможува да гледаме кон иднината со целосна доверба, во која ќе продолжиме да го шириме нашето присуство на глобално ниво и да постигнуваме уште поголеми деловни успеси, изјави Мартина Далиќ, претседател на Управниот одбор на „Подравка“.

 Извор:Instore.rs

 Фото: „Подравка“