Хрватска: „Подравка“ ја заврши аквизицијата на „Белје“, „Вупик“ и „Пик Винковци“

Со потпишување на договорот за пренос на уделите, „Подравка“ ја заврши аквизицијата на земјоделскиот сегмент на групацијата „Фортенова“, со што е финализиран процесот на преземање на „Вупик“, „Белје“, „Пик Врбовец“, „Енергии Градец“, „Белје Агро Вета“ и „Феликс“.

 „Подравка“ како сопственик на сите компании членки на групацијата   стопанисува со земјоделскиот сегмент преку компанијата „Подравка Агри“.

Со склучувањето на оваа аквизиција, горди сме што отвораме ново поглавје во историјата на групацијата „Подравка“.Групацијата „Подравка“ на тој начин ќе ги надмине приходите од над една милијарда евра и ќе има повеќе од 8.800 вработени. Со успешното завршување на овој тежок процес, ја потврдуваме нашата посветеност на развојот на хрватската економија и домашното земјоделство. Задоволство ми е, во име на сите наши колеги, да им посакам добредојде на новите членови во успешната и силна групација „Подравка“. Имаме намера да ја зајакнеме силата и важноста на новите членки преку значителни инвестиции и заедничка работа на имплементација на амбициозни развојни планови. Оваа аквизиција е можност сите заедно да изградиме одржлива и успешна иднина за групацијата „Подравка“ и сите нејзини членки, нагласи Мартина Далиќ, претседател на Управниот одбор на „Подравка“, воедно и претседател на Надзорниот одбор на компанијата „Подравка Агри“.

По само една година целосно ја привршуваме продажбата на земјоделскиот оддел на групацијата „Фортенова“. Им честитам на сите тимови од двете компании за нивниот голем напор и експертиза за успешно менаџирање и завршување на овој процес, како и на нашите советници за нивната професионална поддршка. По речиси две децении заедничка работа, инвестиции и развој, од групацијата „Фортенова“ заминуваат пред се луѓе чија посветеност беше клучна за развојот и силата на нашето земјоделство. Колегите од „Подравка“ веќе имаа можност да се запознаат со бројните потенцијали на земјоделската дивизија, но највредното богатство што го преземаат секако се нашите луѓе. Убедени сме дека токму нивното знаење и искуство ќе додаде нова вредност и дополнително ќе го подобри работењето на „Подравка“. За групацијата „Фортенова“, овој формален чин претставува почеток на ново партнерство меѓу две големи компании. Уверен сум дека земјоделските компании со својата експертиза, фокусирано лидерство и развојна визија ќе постигнат понатамошен раст и успех. Со нетрпение очекувам да имам можност да бидам сведок на ова, изјави Фабрис Перуско, член на Управниот одбор и извршен директор на групацијата „Фортенова“.

Со сегментот храна предводен од „Подравка д.д.“ и Фармацевтски производи претставени од „Белупо“, земјоделството предводено од „Подравка Агри“ станува третиот столб на бизнисот на групацијата „Подравка“.

На чело на компанијата „Подравка агри“ која ќе управува со земјоделски компании ќе биде Давор Доко, исто така член на Управниот одбор на „Подравка“. Неговата задача ќе биде да обезбеди ефикасна интеграција на земјоделските компании во групацијата „Подравка“ и подобрување на резултатите на компаниите со кои управува „Подравка Агри“.

„Подравка“ ќе започне инвестициски циклус во новоприземените компании со фокус на модернизација на технологијата, системите за наводнување и подобрување на условите за работа. Планот е дополнително да се прошири мрежата на подизведувачи, со што ќе се зајакне домашното производство и стабилноста на синџирот на снабдување.

Да потсетиме, на крајот на минатата година, „Подравка“ и Европската банка за обнова и развој (ЕБОР) потпишаа договор за акционерско вложување од 50 милиони евра во „Подравка Агри“, со што ЕБОР стана партнер во компанијата „Подравка Агри“.  Така, „Подравка“ има 84,99% сопственички удел во компанијата „Подравка Агри,“ додека ЕБОР поседува 15,01%.

 Навистина сум горд што ЕБОР учествуваше во една од најголемите аквизиции во прехранбениот сектор во регионот во последните години. Оваа инвестиција ќе овозможи понатамошен развој на земјоделските компании преземени од групацијата „Подравка“, зајакнување на нивната конкурентност и воведување одржливи практики. Исто така, овој проект претставува продлабочување на нашето долгорочно стратешко партнерство со една од водечките прехранбени компании во Југоисточна Европа. Ќе работиме заедно за да го реализираме целосниот потенцијал на оваа аквизиција, потпирајќи се на нашето богато искуство во земјоделскиот сектор, споделување знаење и активно учество во Надзорниот одбор и други клучни активности, додаде Миљан Ждрале, регионален директор на ЕБОР за Централна Европа.

Извор: InStore.rs

Фото: „Подравка“