Истражување на „Инсајдер ИД“: Топ 3 синџири маркети за 2021 година

Агенцијата за истражување и консалтинг „Инсајдер ИД“ го спроведе истражувањето „Преферирани ланци на маркети и најпознати брендови 2021година” во кое се анкетирани повеќе од 1,250 активни потрошувачи на територија на целата државата.

Резултатите покажуваат дека и во 2021 година има голем подем на дисконти особено КАМ и „Стокомак“ на првите две позиции.

И двата синџири маркети бележат пораст од 10% за само една година, а со тоа ја зацврстуваат позицијата и привлекуваат сè поголем број потрошувачи. Всушност, КАМ е петта година по ред на првата позиција како префериран синџир од страна на потрошувачите, и кој по 4 години намалување од 67,8% на 59,9% бележи пораст од 11% за да оствари највисоко учество од 70,8%. КАМ маркет бележи и висока лојалност кај потрошувачите од 41%, или од 10 потрошувачи во маркетот четворица се лојални. Проширување на малопродажната мрежа и зголемувањето на асортиманот, влијаат на привлекување на поголем број на потрошувачите и во поголеми региони, пишува во истражувањето. 
 
Според податоците од 2017 до денес, „Стокомак“ го има најпрогресивниот пораст од сите маркети кои што се анализирани и само во последната година има пораст од приближно 9% во однос на 2020.  Од 24,5% се искачува на 49,3% или анализирано од 2017- та до денес, „Стокомак“ има двојно повисоко учество, а со тоа и потрошувачи. Значителното зголемување на малопродажната мрежа пратено од ниска ценовна политика, придонесе да „Стокомак“ бележи многу брза пенетрација на пазарот и привлекување на голем број потрошувачи за краток рок.

Трето рангираниот „Тинекс“, за прв пат од почеток на истражувањето во 2017-та забележува раст на учеството. Од 27,0% во 2020-та година уделот се зголемува на 30,9%, кој иако не е значително висок, укажува на позитивна промена кај потрошувачите на променетиот бизнис модел на синџирот. 

За разлика од претходните истражувања каде се прогласуваа само преферирани маркети, во овогодинешното се мери и лојалноста на потрошувачите по маркет. Ако во КАМ маркет пазарат 70% од потрошувачите, од нив 41,5% се лојални на брендот. 
 
На втората позиција како маркет со најголема лојалност на потрошувачи е позициониран „Веро“ со 39,8% од потрошувачите. Бизнис концептот со исклучително високиот асортиман на производи, очекувано е да ги задржува најголем дел од потрошувачите како „лојални“ особено оние кои преферираат пазарење на една локација на повеќе производи во различни категории и голем избор на производи, се вели во истражувањето. 

„Жито“ е на третата позиција според лојалност на потрошувачи. Според резултатите, сиџирот ги има едно од најстабилните учества во сите истражувања од 2017 до 2021 со осцилација од максимални +/-2%. Таквиот континуитет сугерира, дека потрошувачите се стабилни низ годините и придонесуваат за одржување на позицијата на маркетот како според вкупниот број на потрошувачите кои пазарат така и според лојалните.

Од истражувањето спроведено од „Инсајдер ИД“ за перцепцијата кај македонските потрошувачи за „Лидл“, 91% би го замениле преферираниот маркет за да пазари во германскиот синџир. Податокот дополнително ја потврдува непостојаноста на потрошувачите а и го потенцира значењето на високата лојалност која ја „уживаат” во случајот КАМ, „Веро“ и „Жито“. 

Со дополнителното зголемување на учествата за дисконти, и многу доминантната позиција се наметнува прашањето до кога може да се очекува нивниот пораст. Вкупниот збир само на „Стокомак“ и КАМ надминува 120% што посочува дека сите потрошувачи пазарат минимум кај еден од нив а дел од нив и во двата паралелно. Дисконтите се веќе „нормалниот маркет” во кој се пазари, додека останатите концепти се конкурираат да го привлечат потрошувачот преку различни канали на промоција и понуда на поголем асортиман на производи. Сепак, дисконтите може да се очекува да почнат да стагнираат и постепено (што е и случајот) да го прошируваат значајно асортиманот и да нудат повеќе производи или потрошувачко искуство кои претходно не биле својствени за ваквите концепти, заклучува „Инсајдер ИД“.  

Според агенцијата, со влезот на „Лидл“, просторот за проширување на дисконтите ќе биде ограничено и преземањето на потрошувачите од едни кај други ќе биде уште попредизвикувачко. Промената на бизнис-моделите пред се ќе треба да биде во задржување на мометалните клиенти многу повеќе отколку во привлекување на нови. На краток и среден рок (до 3 години) одржувањето на нивото на потрошувачи и висината на приходите ќе биде пресудно за одржување на компаниите на долг рок.