Втор Skopje Marketing Summit: Секој бренд мора да ја најде својата тема

Многу споделени искуства за маркетингот во сегашноста и очекувања од иднината, лични приказни за патот до инспирацијата, примери од сопствената работа кои можат и на други да им послужат - се само дел од тоа што го видовме и слушнавме на вториот Skopje Marketing Summit што се одржа вчера, онлајн и во живо, во организација на „Кликер маркетинг“. 

Инспиративни и полни со податоци беа презентациите на предавачите. Самитот го отвори Славимир Стојановиќ Футро, наградуван белградски дизајнер, визуелен уметник, автор и професор. Тој зборуваше на темата „Брендинг - од флерт до сериозна врска“. Притоа, раскажа како од приказните за добра ноќ за неговата ќерка настанал ликот на девојчето Синги Лумба, овековечен и во книга чие трето продолжение треба да излезе летово. Таа емоција подоцна се отсликала и во неговите комерцијални дела. Првото лого што го направил било за белградска галерија. Потоа се ределе логоа - за Радио Б92 во 90-тите години од минатиот век, за Народниот музеј на Србија, редизајни за „Нелт“, за „Хемофарм... Но, имам и проекти на кои работам како некоја лична иницијатива и завршуваат во корпа, но од нив многу учам. Секој експеримент се исплати, важно е да се пробува што се се може. Тоа вртење во круг на крај сепак е од корист, рече Славимир. Тој зборуваше и за девијациите во културата и во општествениот живот на Балканот, за специфичната балканска естетика, дух и хумор, наведувајќи го како пример настапот на Констракта на последната Евровизија.

Јана Савиќ Растовац, извршен креативен директор во агенцијата McCann – Белград преку примери од кампањи на Агенцијата покажа зошто на брендовите треба да излезат од комфорната зона.  Јас длабоко верувам во храброст. Сакам да речам дека страста поместува планини и дека храброста е многу важна, порача Јана преку презентацијата на пет кампањи од овие простори за „скокотливи прашања“ (проблем на одржливост на системите за донации (Mastercard), ЛГБТ (Coca cola) доење во јавност (Rosa), несакано раѓање на женските деца во Црна Гора...) . Таа прикажа резултати од истражување на нивната агенција, според кои 77 отсто од луѓето во светот ја поддржуваат активната улога на брендовите во општеството, но 41 отсто од истите луѓе не би се загрижиле ако тие брендови утре исчезнат. Денес брендовите не само што продаваат производи и услуги, туку мораат да креираат некоја смислена улога во животот на луѓето. Кога не знаеме што да правиме, ќе посадиме дрво или ќе исчистиме парк. Постојат многу теми со кои брендовите можат да се занимаваат - на пример, одржливи градови, партнерста за развој, искоренување на сиромаштијата или борба против секаков вид нееднаквост. Тргнувајќи од својата филозофија, секој бренд може да ја најде својата тема. Креативноста е единствен начин да преживееме во својата работа, вели таа. 

Игор Божиновски, сопственик на „Божиновски часовници и накит“ зборуваше за можностите за локализација на глобалните брендови, преку примерот на првиот македонски дизајниран swatch - часовник по повод 30 годишнината од независноста на Македонија. Ја раскажа приказната која почнала од посетата на Папата на Скопје во 2019 година и кампањата за часовникот Pope (инспирарана од едноставниот Swatch пластичен часовник на Папата), после која се зголемила продажбата на конкретниот модел. Потоа следува јубилејот, 30 години независна Македонија. Беше речиси невозможна мисија како да убедиме еден гигант од бренд каков што е Swatch дека сакаме во Македонија да произведеме дизајниран часовник, и тоа во ограничена серија од само 30 часовници? Но, успеавме и тоа беше единствен во светот лимитиран национален часовник. Така се роди Дениција, првиот македонски swatch часовник, по стиховите од песната на Петре М.Андреевски. Потоа креиравме платформа за да може секоја година да се креира нова едиција на часовник, да не заврши како еднократна приказна. Часовникот предизвика огромен интерес во јавноста и се продаваше на аукција за која исто имаше огромен интерес. Ефектот од локализацијата на брендот Swatch беше 23 отсто пораст на продажбата во првиот квартал од 2022. Swatch веднаш почна да развива идентичен проект во Русија, кој поради актуелните прилики не се реализира, раскажа Игор Божиновски. 

Нели Ангелова, менаџер за комуникации во „Нестле“ за Југоисточен регион, зборуваше за двојната еднаквост на односите со јавноста во дигиталната ера. Таа ги спомна четирите важни канали на влијание врз јавноста: 1)традициoнални медиуми; 2) настани; 3) преку познати ѕвезди; 4) преку уметноста. Но, сега има една важна разлика во каналите за комуникација, а тоа е брзината. Брзината радикално ги смени правилата на игра. Ниту една содржина, колку и да е интересна, не го задржува вниманието на публиката на интернет повеќе од 2 минути. Видливоста на пораката трае само 6 секунди. Што и кому може да се каже нешто за 6 секунди? Друга работа е што во дигиталниот свет, ништо, па ни најдобриот настан, не живее повеќе од 24 часа. Тоа е информативно натпреварувачка средина во која треба да се снајдеме, кажа Нели. 

Сузана П.Никофорова (бренд-менаџер  и маркетер, консултант на Lego Serious Play, основач е на Animaway, агенција за брендирање на промените за подобар свет) укажа зошто треба да се смени начинот на кој се работи со брендовите. Промени го брендот за да го промениш светот, но како? Пред 20 години маркетингот претставуваше само лого кое треба да биде добро, но сега, според пребарувањата, огромна е бројката на луѓето што пребаруваат што е бренд. Па дали навистина знаеме што е бренд, кога во исто време ги знаеме големите брендови, ги сакаме и ги користиме? Промената на перцепцијата е клучна. Сите го гледаме светот различно. Со промената на перцепцијата може да се промени приказната и да се смени животот. Никифорова истакна дека новата перцепција и гледање на брендовите подразбира нивно гледање како психолошки, социјални и бизнис алатки.  Моќта на брендот е без лимити и зависи од креативниот поценцијал и знаењето и секако од буџетот, рече таа. 

Стефан Ивановиќ, СЕО во центарот за маркетинг-стратегии ePlus и претседател на Централноевропската агенција за развој и соработка (CEARAS), ги претстави трендовите во пакуваната храна за 2023 година (достапност, снек-барови наместо оброк, тик-ток едноставни рецепти, опуштена конзумација без формалности, експериментирање со нови вкусови, прибегнување кон домашна, органска, природна храна, важноста на сензорната комуникација со брендот...).  

Јасна Стоимировска - Величков, основач на „Арел невромаркетинг“; претстави што е тоа што купувачите не можат да го кажат, а го искажуваат со своите потсвесни реакции преку изборот на производи што ги купуваат. Таа ги претстави алатките за препознавање на емоциите на купувачите, кои донесуваат важна одлука уште пред купувачот да биде свесен за тоа. Познавањето и употребата на такви алатки им помага на брендовите подобро да се позиционираат пред купувачите. 

Климе Мицковски ги сподели своите сознанија од искуството како дигитален маркетинг-експерт/хакер за пораст, со долгогодишно искуство во медиумите, дигиталните медиуми и технологијата. Зборуваше за примената на дата-податоците од страна на големите корпорации и начините на кои тие ги користат тие податоци за манипулирање со емоциите. Во денешниот дигитален свет мораш да знаеш да интерпретираш податоци и да донесуваш одлуки врз основа на истите, вели Климе. Неговото очекување е дека во иднина податоците ќе станат поприватни и нема да се толку достапни до секој корисник на интернет.

Стивен Трајковски, (технолог, претприемач и инвеститор со над 20 години искуство, кој им помага на компаниите да се развиваат преку технологии, операции и стратегија за луѓе) го објасни терминот WEB3 и неговото влијание врз дигиталниот маркетинг во иднина, преку: 1)децентрализација; 2)подемократска верзија на интернетот и 3)доверба.  

Поопширно за пораките од Самитот ќе читате во следниот, јунски број на магазинот InStore. 

Голема благодарност за спонзорите на овој настан: