„Амазон“ ги ограничи патувањата на вработените до крајот на април

Интернет трговецот „Амазон“ ги ограничи деловните патувања на своите вработени во Италија, Иран, Јапонија и Јужна Кореја поради глобалната епидемија со корона вирусот. Ограничувањето засега е определено до крајот на април. 

Трговецот побара од вработените да ги одложат непотребните патувања, вклучувајќи ги и оние внатре во САД. 

Неодамна, од истата причина, „Амазон“ ја откажа и интернет конференцијата што требаше да се одржи во Лас Вегас. Покрај тоа, трговецот ја прекина праксата интервјуата за нови вработени да се прават лично и сега ги спроведува по пат на видео-повик. 

Истите ограничувања за патувања на вработените ги наложи и „Гугл“. 

„Амазон“ минатата година потроши 220 милиони долари на трошоци поврзани со службените патувања.