Унгарија: Владата воведе контрола на цените

Унгарската влада воведе контрола на цените на храната, откако инфлацијата го достигна највисокото ниво во Европската Унија од 7,1%.

Под притисок на инфлацијата и бавното економско закрепнување, премиерот Виктор Орбан ги ограничи маржите на 30 групи на прехранбени производи за да го спречи зголемувањето на цените.

Доколку владата утврди дека малопродажните синџири не ја почитуваат регулативата, ќе ја прошириме на сите категории на храна. Подготвени сме и повторно да ги воведеме регулираните цени како последно средство, соопшти унгарското Министерство за економија.

Годишната инфлација во Унгарија е највисока меѓу членките на ЕУ. За време на претходниот голем бран на инфлација во 2022-2023 година, цените на храната се зголемија до просекот на ЕУ, а владата, исто така, воведе контрола на цените во тоа време. Сепак, според истражувањето на унгарската Централна банка, претходното зголемување на цените беше делумно предизвикано од ниската продуктивност и високата потрошувачка на енергија во прехранбената индустрија - проблеми што останаа и по падот на инфлацијата.

Досегашните ограничувања на цените на храната имаа негативни последици, бидејќи компаниите ги надоместуваа загубите со зголемување на цените на другите производи, велат од Централната банка.

 Унгарското здружение за малопродажба ОКСЗ проценува дека најновите мерки би можеле да ја намалат инфлацијата на храната за еден до два процентни поени, под услов да нема дополнителни зголемувања на цените во синџирот на снабдување.

Извор: Bankar.me

Фото: Freepik