Чешка: Продавниците првенствено ќе продаваат домашна храна

Чешките законодавци ја одобрија легислативата со која се бара продавниците да продаваат првенствено домашна храна, што ќе им биде од корист на локалните производители.

Со тоа земјата е ставена во потенцијален конфликт со Европската комисија околу правилата за единствен пазар на ЕУ.

Мерката предвидува дека продавниците со поголема површина од 400 квадратни метри од следната година ќе треба да понудат асортиман со најмалку 55% производи од локално потекло. Процентот постепено ќе се зголемува до 73% до 2028 година.

Квотите се дел од нацрт-законот насочен кон спречување на двојните стандарди во храната, прашање што некои поранешни комунистички членки на Европската Унија го следат со години. Тие тврдат дека инфериорните прехранбени производи, кои не се посакувани од потрошувачите во побогатите западни држави на ЕУ, се продаваат во посиромашните источни пазари.

Амбасадорите на осум земји на ЕУ, вклучувајќи ги Германија и Франција, предупредија да не се усвојува овој нацрт-закон со писмо испратено до пратениците.