Компаниите „Јунгхајнрих“ и „Мову Роботикс“ склучија стратешко партнерство со цел побрза и поефикасна реализација на високоавтоматизирани магацински решенија за палети.
Според договорот, „Јунгхајнрих“ во иднина ќе има улога на префериран интегратор за shuttle системите на „Мову“, додека „Мову Роботикс“ ќе стане префериран снабдувач на shuttle технологија за „Јунгхајнрих“.
Растечките трошоци за магацински простор, сложената модернизација на постојните објекти и потребата за поголема густина на складирање ја зголемуваат побарувачката за автоматизирани магацини за палети. Особено се барани четиринасочните shuttle системи, како решението Movu Atlas, кои овозможуваат складирање палети во повеќе длабочини и оптимално искористување на просторот.
Партнерството има цел проектирањето, имплементацијата и управувањето со shuttle магацините да ги направи поедноставни и поефикасни. Двете компании ги интегрираат четиринасочните shuttle системи директно во WMS и софтверскиот екосистем на „Јунгхајнрих“, кој централно управува со залихите и ги оптимизира процесите на складирање и преземање на стоката.
Стандардизираните софтверски интерфејси треба да го забрзаат пуштањето на системите во работа и поврзувањето со постојните ИТ-решенија на купувачите, додека заедничкиот развој на понудите ќе го скрати времето за подготовка на проектите. Компаниите ги усогласиле и сервисните процеси за да обезбедат стабилно и сигурно функционирање на системите во текот на целиот животен циклус.
Купувачите ќе имаат придобивки од целосно интегриран автоматизиран проток на материјали – од приемот на стоката, преку shuttle магацините, па сè до испораката. Shuttle системите, транспортните линии и мобилните роботи ќе бидат обединети преку интегрираната софтверска платформа на „Јунгхајнрих“, која овозможува целосна прегледност на процесите, помала оперативна сложеност и флексибилност за иден раст.
Shuttle системите на „Мову“ моментално се користат во повеќе од 200 магацини низ светот и веќе се имплементирани во бројни проекти на купувачите на „Јунгхајнрих“ во Европа и Северна Америка.
Компаниите најавија дополнително усогласување на проектирањето на решенијата, технолошките интерфејси и сервисните процеси. На овој начин „Јунгхајнрих“ дополнително ја зајакнува својата позиција како глобален системски интегратор кој ги обединува автоматизацијата на магацините, софтверските решенија и сервисната поддршка во единствен систем што се развива заедно со потребите на купувачите.
