Француската влада предложи доброволен депозитен систем за амбалажа, според кој локалните власти самостојно би одлучувале за неговата примена, со што направи чекор назад во однос на претходните планови за задолжителен национален систем за пластични шишиња, пренесува ESM Magazine.
Одлуката следува по повеќемесечни консултации што француската влада ги спроведе со локалните власти, претставници на индустријата, здруженија на избрани функционери и компании од секторот за рециклирање, со цел да ги утврди најефикасните начини за исполнување на европските цели во областа на рециклирањето пластична амбалажа.
Европската регулатива за амбалажа и отпад од амбалажа (PPWR) поставува цел до 2030 година стапката на рециклирање на пластичната амбалажа да достигне 55%, додека стапката на собирање пластични шишиња до 2029 година треба да достигне 90% во сите земји членки на Европската Унија.
Резултатите од анализата покажале дека Франција заостанува зад овие цели. Во текот на 2024 година стапката на рециклирање на пластичната амбалажа во Франција изнесувала само 25,7%, додека стапката на собирање пластични шишиња достигнала 58,3%. Според оценката на француската влада, овие резултати ја вбројуваат земјата меѓу најслабо рангираните членки на Европската Унија кога станува збор за управувањето со пластичниот отпад.
Анализата покажала и значителни разлики меѓу регионите. Во руралните подрачја стапката на собирање пластични шишиња достигнува речиси 77%, додека во големите градови паѓа под 35%.
Владата смета дека единствен задолжителен депозитен систем би можел негативно да влијае врз локалните заедници кои веќе постигнуваат добри резултати, а истовремено дополнително би ги оптоварил подрачјата што се соочуваат со поголеми предизвици при собирањето отпад.
Поради тоа е предложен пофлексибилен пристап, кој повеќе ќе ги зема предвид специфичностите на одделните региони и ќе им овозможи на локалните власти самостојно да одлучуваат за примената на депозитниот систем.
Француската влада ги повика сите заинтересирани страни да ги продолжат разговорите во следните денови, со цел да се прецизираат деталите од новиот план за управување со пластичниот отпад и да се подобрат резултатите од рециклирањето во земјата.
