Во рамките на тековната стратешка ревизија, „Хејн Селестиал“ објави дека постигнал конечен договор за продажба на својот меѓународен бизнис на глобалната компанија „Аурелиус“ за околу 323 милиони долари во готовина.
Продажбата ќе опфати најголем дел од меѓународното работење на „Хејн Селестиал“, вклучувајќи ги брендовите Ella's Kitchen за храна за бебиња и деца, Joya и Natumi за растителни пијалаци, Hartley’s за желе, како и Linda McCartney Foods, Cully & Sully, Yorkshire Provender и New Covent Garden за супи, меѓу другите.
„Завршувањето на трансакцијата што ја објавуваме денес ќе ја унапреди нашата стратегија за поедноставување на портфолиото и ќе ни овозможи да ги насочиме нашите ресурси кон натамошно намалување на долгот на компанијата. Бизнисот што потоа ќе остане во Северна Америка ќе опфаќа водечки брендови во атрактивни категории, со поедноставен оперативен модел и поголем фокус на клучните можности за раст. Сакам да им оддадам признание на исклучителните луѓе кои стојат зад нашите меѓународни брендови и работењето. Исклучително ги цениме нивната посветеност, стручност и ангажман во текот на многу години. Тие изградија извонредни брендови за кои сме уверени дека ќе продолжат да напредуваат под новиот сопственик“, изјави Алисон Луис, претседателка и извршна директорка на „Хејн Селестиал“.
Портфолиото на компанијата во Северна Америка по трансакцијата ќе ги вклучува Celestial Seasonings чаевите, The Greek Gods јогуртот и Earth's Best Organic производите во нејзините клучни категории – чај, јогурт и храна за бебиња и деца. Портфолиото ги вклучува и Spectrum Organic маслата за готвење, MaraNatha путерите од јаткасти плодови и Imagine супите.
Завршувањето на трансакцијата се очекува во вториот квартал од деловната година на компанијата, кој завршува на 31 декември 2026 година, а добиените средства ќе бидат искористени за намалување на долгот на „Хејн Селестиал“.
