Француската влада предложи план за проширување на данокот на шеќер, кој се применува на безалкохолните пијалаци, и на преработената храна со висока содржина на шеќер, како дел од мерките чија цел е унапредување на јавното здравје во земјата, пишува FoodBev.
Во буџетот за 2027 година, француската влада наведува дека индустриски преработената храна што содржи адитиви, често нарекувана ултрапреработена храна (UPF), значително придонесува за прекумерната консумација на шеќер.
Се предлага проширување на данокот на шеќер, кој моментално ги опфаќа засладените безалкохолни пијалаци, како дел од мерките за справување со основните причини за хроничните заболувања поврзани со исхраната богата со шеќер, како што се дијабетесот и кардиоваскуларните заболувања.
Предложеното проширување би се применувало според скала заснована на содржината на шеќер. Владата соопшти дека сака да ги заштити „висококвалитетната храна што ја произведуваат француските земјоделци, како и занаетчиските производи“.
Во буџетот се наведува дека 40% од возрасните и 80% од децата во Франција консумираат премногу шеќер, додека потрошувачката на преработена храна пораснала за 170% од осумдесеттите години на минатиот век.
„Намалувањето на прекумерната консумација на шеќер е еден од главните приоритети на јавното здравје. Производителите на пекарски и слаткарски производи имаат одговорност да дадат свој придонес и ние ја прифаќаме таа одговорност. Сепак, FEB се противи на предложеното проширување на данокот. Сметаме дека владата треба да ја препознае и поддржи заедничката работа за намалување на шеќерот што нашата федерација веќе ја презеде со надлежните државни органи. Повеќе од една година нашиот сектор соработува со Министерството за здравство и Министерството за земјоделство на доброволен договор за индустриски слатки и производи од лиснато и квасно тесто“, изјави за FoodBev Пол Боавен, генерален директор на националното трговско здружение Fédération des Entrepreneurs de Boulangerie (FEB).
Членките на FEB подготвуваат доброволен договор чија цел е просечната содржина на шеќер во нивната понуда на производи да се намали за најмалку 5% до 2031 година, истакна Боавен. Целта е „вистинско намалување на шеќерот“, без надоместување на неговото количество со употреба на замени или адитиви.
Сепак, Боавен тврди дека оданочувањето на производите без признавање на постојните напори на компаниите за преформулирање на производите „испраќа контрадикторна порака“.
„Данокот сам по себе не гарантира трајно подобрување на исхраната. Неискрено е да се тврди спротивното во обид да се оправда прикриен данок“, додаде Боавен.
Тој изрази загриженост за способноста на малите и средните претпријатија да инвестираат, имајќи предвид дека се соочуваат со дополнителни трошоци покрај оние за развој на рецептури, пробно производство и тестирање на производите.
„Данокот, исто така, би создал нееднакви услови меѓу претходно спакуваните производи и производите што се продаваат неспакувани. Споредливи производи со иста содржина на шеќер би можеле да бидат различно третирани само поради начинот на кој се спакувани и продавани. Не гледаме никакво оправдување од аспект на јавното здравје за таквата разлика во третманот“, изјави Боавен.
Квалитетот на производите може значително да биде засегнат при преформулирањето со цел намалување на шеќерот, поради неговата функционална улога која не се сведува само на засладување. Шеќерот може да придонесе и за текстурата, изгледот и рокот на траење, а Боавен нагласи дека зачувувањето на квалитетот е од клучно значење за успешно преформулирање, истовремено помагајќи им на потрошувачите да се навикнат на помалку слатки вкусови.
„Ризикот е данокот да ги одземе средствата потребни за спроведување на овие промени. Компаниите би можеле да бидат принудени да ги сносат трошоците преку пониски маржи или дел од нив да ги пренесат врз потрошувачите“, заклучи тој.
Прописите што се однесуваат на намалувањето на шеќерот значително се проширија во Европа во текот на последната деценија, иако најголемиот дел од важечките давачки во моментов се насочени кон засладените пијалаци.
Британската влада минатата година најави планови за проширување на данокот Soft Drinks Industry Levy, со кој, покрај традиционалните газирани и овошни пијалаци, би биле опфатени и дополнителни категории, вклучувајќи млечни пијалаци и готови пијалаци од кафе. Исто така, прагот на содржина на шеќер е намален од 5 грама на 4,5 грама на 100 милилитри, а на производителите им е даден рок до 1 јануари 2028 година да го намалат количеството шеќер во своите пијалаци за да го избегнат данокот.
Полска неодамна предложи проширување на својот данок на шеќер за да опфати повеќе формати на пијалаци, вклучувајќи концентрати и додатоци во исхраната подготвени за консумација. Доколку промените бидат одобрени, тие би стапиле во сила на 1 јануари 2027 година.
Германија, исто така, предложи воведување нов данок на шеќер во безалкохолните пијалаци од 2027 година, иако производителите го критикуваа предлогот, наведувајќи дека забрзаната временска рамка, со оглед на тоа што претходно беше предложено прописите да почнат да се применуваат во 2028 година, би можела да има значителни финансиски последици за компаниите и да им остави премалку време за подготовка.
