Управата за јавни приходи информира дека започна со генерирање на месечните пресметки за придонесите за задолжително социјално осигурување за самовработените лица кои данокот на личен доход го плаќаат врз основа на паушално утврден нето-доход. Со измените на Законот за придонеси од задолжително социјално осигурување, паушалистите повеќе немаат обврска сами да поднесуваат МПИН пресметка за своите придонеси. УЈП ги изготвува пресметките и ги поставува на корисничките профили на даночните обврзници на системот „Е-Даночни услуги“.
За јули и август 2026 година УЈП изгенерирала околу 7.000 МПИН пресметки за околу 3.500 самовработени паушалисти. Пресметките може да се преземат преку корисничкиот профил, да се добијат на пријавената електронска адреса или лично во канцелариите на УЈП. Дел од занаетчиските комори, во соработка со УЈП, овозможиле пресметките и налозите да се подигнат и преку коморите.
Новите МПИН пресметки што ги генерира УЈП се однесуваат на носителите на паушалното оданочување, односно самовработените лица регистрирани како вршители на дејност. Доколку паушалистот има вработено друго лице, за тоа вработено лице тој и понатаму сам поднесува МПИН пресметка. Од УЈП појаснуваат и дека паушалистите кои самите веќе поднеле МПИН за јули и август 2026 година и ги платиле придонесите, немаат обврска повторно да плаќаат по пресметките што дополнително ги генерирала УЈП.
Од УЈП подвлекуваат дека основицата за пресметка на придонесите е месечната аконтација на паушално утврдениот нето-доход на кој се плаќа данок на личен доход. Тоа значи дека основицата за данокот на личен доход и основицата за придонесите се идентични. Паушалистот може, доколку сака, да плаќа придонеси и на повисока основица. За тоа треба да поднесе барање до надлежната организациона единица на УЈП и да ја наведе посакуваната основица.
Паушалистите можат да бидат пријавени и на полно и на скратено работно време. Според УЈП, бројот на пријавени работни часови во моментов не влијае врз висината на основицата за придонесите. Основицата се утврдува врз основа на паушално утврдениот нето-доход и не се намалува според бројот на часови за кои лицето е пријавено.
Од УЈП додаваат дека автоматските известувања-опомени за неподнесена МПИН пресметка кои дел од паушалистите ги добиле по е-пошта во периодот на воведување на новиот систем се прогласени за неважечки. објавува Журнал.мк
