Грчкиот малопродажен синџир „Масутис“ разгледува можности за проширување надвор од домашниот пазар, а меѓу потенцијалните дестинации се Македонија, Србија и Унгарија, објавија српските медиуми.
Интересот за можен влез во Србија го привлече информацијата дека компанијата регистрирала интернет-домен наменет за тамошниот пазар. Според податоците од регистарот, сопственик на доменот е компанијата „Дијамантис Масутис“, со седиште во Терми, во близина на Солун.
Извори од српскиот малопродажен сектор неофицијално наведуваат дека синџирот размислува за меѓународна експанзија, која би можела да ги опфати трите балкански и средноевропски пазари. Од компанијата засега нема официјална потврда за овие планови.
Регистрацијата на доменот може да претставува прв сигнал за подготовка на влез во Србија, но сама по себе не значи дека е донесена конечна одлука за отворање продавници.
Со преземањето на „Критикос“ стана втор најголем синџир во Грција
Годинава „Масутис“ одбележува 50 години од основањето, во период на големи промени во работењето. Во мај грчката Комисија за конкуренција, под определени услови, го одобри преземањето на малопродажниот синџир „Критикос“.
Со оваа аквизиција, „Масутис“ стана втор најголем трговец на мало во Грција, со повеќе од 1.200 продавници и годишен промет од приближно две милијарди евра.
Компанијата имаше силна позиција на грчкиот пазар и пред преземањето. Според официјалните финансиски податоци, на крајот од 2024 година управувала со 382 објекти – 346 супермаркети, 15 продавници од форматот Grand и 21 Cash & Carry центар.
Синџирот е особено присутен во северниот дел на Грција и во туристичките места, поради што е добро познат и меѓу македонските и српските туристи. Компанијата располага и со високо автоматизиран логистички и дистрибутивен центар во Калохори, во близина на Солун.
Засега останува неизвесно дали регистрацијата на доменот е направена само за заштита на името на компанијата или претставува почеток на конкретни подготовки за регионално проширување. Сепак, по преземањето на „Критикос“, „Масутис“ располага со значително поголема продажна мрежа и капацитет за евентуален влез на нови пазари.
