„КАМ“ ги зголеми платите и најави регрес од 52.000 денари

Компанијата „КАМ“ ги зголеми платите на вработените во двата свои најголеми сектора – продажбата и логистиката, како дел од мерките за подобрување на условите за работа и финансиската сигурност на вработените.

Зголемувањето за вработените во Логистичкиот центар било реализирано со мајската плата, додека новите износи за вработените во маркетите биле применети со исплатата на јулската плата.

Според информациите од компанијата, основната плата на сите работни позиции во секторот за продажба сега во просек е за 29 проценти повисока од минималната плата во државата. Просечната исплатена плата на ниво на компанијата, пак, е за 22 проценти повисока од просекот во дејноста.

Дополнително, „КАМ“ годинава ќе исплати регрес за годишен одмор во износ од 52.000 денари. Од компанијата посочуваат дека овој износ е речиси трипати повисок од законски утврдениот минимален регрес во земјава.

Покрај зголемувањето на платите и исплатата на регресот, компанијата продолжува да го развива и системот на дополнителни поволности за вработените. Во текот на изминатиот месец на вработените им биле обезбедени и ваучери за пазарување во dm.

„Веруваме дека препознавањето и вреднувањето на трудот на вработените треба да биде континуиран процес. Нашата цел е да создаваме работна средина во која луѓето се чувствуваат ценети, поддржани и мотивирани“, велат од „КАМ“.

Од компанијата нагласуваат дека преку платите, надоместоците, дополнителните поволности и подобрувањето на условите за работа продолжуваат долгорочно и системски да вложуваат во своите вработени.