„Макам-транс“ со предупредување до возачите: Нема „ресетирање“ на деновите во Шенген-зоната

Професионалните возачи треба редовно да проверуваат колку денови поминале во Шенген-зоната, особено пред секое ново патување, предупредуваат од Асоцијацијата „Макам-транс“.

При контролата на почитувањето на правилото 90/180, надлежните органи го разгледуваат периодот од 180 дена наназад, сметано од денот на контролата. Во тој период се утврдува вкупниот број денови што возачот ги поминал во Шенген-зоната. Дозволениот престој не смее да надмине 90 дена во кој било период од 180 дена.

Од „Макам-транс“ нагласуваат дека со почетокот на функционирањето на Системот за влез и излез – ЕЕС, нема „ресетирање“ или автоматско бришење на претходно искористените денови. Во пресметката влегуваат сите денови поминати во Шенген-зоната, без разлика дали престојот бил поврзан со професионален ангажман или со приватно патување и годишен одмор.

Поради тоа, на возачите им се препорачува прецизно да ги евидентираат сите датуми на влез и излез. Пред секое поаѓање треба да проверат колку денови веќе искористиле и колку им остануваат од дозволениот престој.

За полесна проверка може да се користи официјалниот калкулатор на Европската комисија за краткорочен престој според правилото 90/180. Сепак, станува збор само за помошна алатка, чија точност зависи од правилното внесување на сите претходни влезови и излези.

Одговорноста за следење на дозволениот престој останува на самиот возач, поради што точната евиденција е особено важна за да се избегнат прекршувања, казни или ограничувања при идните патувања.