Често се зборува за одржливоста како за тренд кој придонесува за подобар имиџ на брендот, привлекува помлади потрошувачи или ги зајакнува комуникациските стратегии, но суштината е многу подлабока од тоа. Стратегијата на одржлив развој и сите иницијативи што ја следат „зелената агенда“ повеќе не се теми што е добро да се имаат и со кои можеме да се пофалиме, туку наша обврска и одговорност. Пристапот кон одржливиот развој го обликува целокупниот начин на кој се работи, се градат односи со партнерите и заедницата. Значи, одржливото работење стана неопходен предуслов за долгорочен опстанок, развој и пораст на секој бизнис.
Во индустријата на храна и стоки за широка потрошувачка, влијанието на климатските промени е особено изразено. Повеќе не станува збор само за вртоглавиот пораст на цените на суровините како какаото или кафето, туку и за тоа како индустријата може да придонесе за нивната долгорочна достапност. Екстремните временски услови, поплавите и сушите создаваат притисок врз синџирите на снабдување и ги зголемуваат оперативните ризици. Дополнително, бројни регулативи, како европската регулатива за спречување на дефорастацијата, бараат трансформација на работењето и поставување и следење мерливи цели засновани на наука. Јасно е дека работењето на FMCG-секторот значително се промени и дека оние кои сè уште не влегле во кругот на трансформацијата ќе мора да го направат тоа што поскоро и да дадат директен придонес преку дополнителни инвестиции, градење значајни партнерства, зајакнување на сите во синџирот и помош на заедниците.
Начинот на кој денес произведуваме храна и ги користиме ресурсите не ги одредува само деловните резултати, туку и светот што им го оставаме на идните генерации.
Иако одржливите промени бараат инвестиции, тие истовремено отвораат простор за иновации и нови модели на пораст. Бројни анализи покажуваат дека одржливите производи побрзо стекнуваат доверба кај потрошувачите, особено меѓу помладите генерации. Одржливоста станува клучен фактор на доверба и лојалност, влијаејќи врз подготвеноста на потрошувачите да платат повеќе за одговорни брендови. Компаниите што инвестираат во декарбонизација и поотпорни синџири на снабдување бележат пониски долгорочни трошоци, постабилни операции и подобра пазарна позиција.
Добро е познато дека најголемите извори на емисии на стакленички гасови во FMCG-секторот доаѓаат од земјоделството. Еден од совршените „алатки“ за зачувување на животната средина е примената на регенеративното земјоделство, кое со правилна и континуирана едукација на фармерите и целиот синџир може да донесе многу бенефити. Доколку стручно се применува и се следи, веќе од две до пет години може значително да го подобри здравјето на почвата, да придонесе за зачувување на биодиверзитетот и да ги намали емисиите. Долгорочно, има потенцијал да ја унапреди економската стабилност, да ги подобри приносите, да го зачува квалитетот на почвата и да спаси загрозени видови. И тоа е само една од можностите, а ги има многу, каде што сите ние како одговорни субјекти мораме да ги пронајдеме најдобрите начини да ги поддржиме, зајакнеме и едуцираме сите засегнати страни.
За сето ова да биде можно, клучна улога имаат лидерите – не само во поддржувањето на спроведувањето на дефинираните ESG цели, туку и во создавањето култура во која одржливоста станува дел од секојдневните одлуки. Едукацијата на вработените, разбирањето на климатските ризици и развојот на вештини потребни за спроведување одржливи практики се подеднакво важни како и инвестициите. Компаниите што ја подигаат свеста и ги вклучуваат тимовите во овој процес побрзо напредуваат, носат поквалитетни одлуки и полесно одговараат на сè построгите стандарди.
Одржливите модели не носат резултати преку ноќ, но им овозможуваат на компаниите долгорочно да планираат, да ја намалат изложеноста на ризици и да обезбедат сигурност во снабдувањето во непредвидлива средина. Одржливоста мора да биде дел од секојдневното деловно планирање, особено во FMCG-индустријата. Начинот на кој денес произведуваме храна и ги користиме ресурсите не ги одредува само деловните резултати, туку и светот што им го оставаме на идните генерации.
