| Дистрибуција и логистика |
На четвртата Talk IN Business конференција,одржана на 1 март 2016 година,како што се очекуваше имавме богата дискусија и суштинско навлегување во корисни теми од дистрибуцијата и логистиката. Зад завесите на целокупното ефикасно работење на FMCG-секторот, стои токму дистрибуцијата која се грижи за непречената циркулација на производите, од производствените капацитети и од дистрибутивните магацини до маркетите.
Оптимизирано магацинско работење, воведување софтверски решенија за ефикасно магацинско и дистрибутивно работење, возен парк кој е приспособен на инфраструктурата во Македонија и на локациите на маркетите, технолошки уреди за ефикасно следење на дистрибуцијата... Со сите овие предизвици секојдневно се соочуваат учесниците на оваа интерактивната конференција. И секако, за сето ова успеавме преку презентации и дискусии да ја изгребеме површината, да ја видиме состојбата и заеднички да понудиме решенија и идни насоки.
За да се зголеми ефикасното работење меѓу маркетите и дистрибутерите, односно производителите, претставник од дистрибутерска компанија ја предложи идејата за користење на ГПС за координација меѓу дистрибутивните компании, а претставник од малопродажбата jaистакна можноста за достава на производите до маркетите во втора и во трета смена. Се разви и одлична дискусија за позитивните и за негативните страни на аутсорсингот во дистрибуцијата, како и за иновативните софтверски решенија кои придонесуваат за долгорочно намалување на трошоците и за зголемување на ефикасноста.
Учесниците имаа можност да ја проследат презентацијата на Нестор Печевски, директор за логистика во „Тинекс", кој зборуваше за логистичките процеси во малопродажбата, а стана збор и за новиот логистички центар и за решенијата што тој ќе им ги понуди на сите партнери на „Тинекс".Дино Шкријељ, директор за логистика во „Кола", зборуваше за оптимизацијата на магацинското и на дистрибутивното работење и како преку мотивирањето на вработените се постигнува ефикасност и ефективност. Владимир Трпаноски, комерцијален директор во „Витаминка", преку примери од работењето на компанијата покажа кои се придобивките од сопствената дистрибуција и како успешно може да се синхронизираат производството и дистрибуцијата.
Меѓу присутните беа: „Кене + Нагел", „Витаминка", „Тинекс", „Кола", „АВТ-интернатионал", „Макпрогрес", „Викторија шпед", „Боми 10 логистик", „Нелт СТ", РСМ, „Сигма СБ", „Мактренд", „Маг комерц", „Пекабеско", „Еуроимпекс", „Алка дистрибуција" и „Квенбергер".
Настанот е реализиран во соработка со Амбасадата на Хрватска во Македонија.
ПОДДРЖАНО ОД:
