Овие трендови ќе им помогнат на бизнисите да бидат во чекор со промените, да ја предвидат мотивацијата за купување и да ги исполнат незадоволените потреби на потрошувачите
Извор: „Еуромонитор интернационал“, www.euromonitor.com
Секоја година „Еуромонитор интернационал“ го креира овој извештај за компаниите да знаат што навистина сакаат потрошувачите. Овие топ-10 тренда ќе им помогнат на бизнисите да бидат во чекор со промените, да ја предвидат мотивацијата за купување и да ги исполнат незадоволените потреби на потрошувачите. Првите 5 тренда се анализирани во претходниот број на InStore.
Светот во 2023 година
- ТУКА И СЕГА
Моментот е сега, не подоцна
Потрошувачите си даваат дозвола малку да живнат. Тие не ја напуштаат финансиската одговорност, но одвреме-навреме решаваат импулсивно да направат одредени дискрециски трошоци. Моменталната, искрена радост, може да биде силен мотиватор за купување. Бизнисите треба да креираат кампањи што се насочени кон посебни пригоди. Алтернативните начини на плаќање можат да помогнат да се распределат трошоците на подолг период, а истовремено да се задоволи и непосредната потрошувачка.
Порив за расипништво
Во изминатите неколку години луѓето се жртвуваа за да се справат со здравствените и економските турбуленции. Наглите карантини и рестрикции го запреа животот каков што го знаеја. Потрошувачите се навикнаа на неизвесноста. „Тука и сега“ значи да се живее во моментот. Не се знае што ќе донесе утрешнината, па потрошувачите одлучија повеќе да не губат време. Парите не се единственото вредно богатство. Времето, здравјето и благосостојбата се еднакво важни. Висината на цените сè уште е релевантна, но емоционалната придобивка ги оправдува одлуките за импулсивно купување. Дискрециското трошење стана поинтенционално. Продуктивноста, личниот развој и радоста се силни причини за купување. Паметното расипништво и достапниот луксуз на потрошувачите им овозможуваат разумно да се релаксираат и да се справат со секојдневието.
Маркетинг – „тука и сега“
Емоционалниот маркетинг, кој повикува на позитивна асоцијација на брендот, може да им помогне на компаниите да ја поттикнат потрошувачката. Брендовите треба да таргетираат одредени, посебни пригоди. Податоците и алгоритмите може да се интегрираат за да се нотираат шеми во веб-активностите што водат до мотивација за купување и активираат приспособени промоции. Креативните кампањи што играат на картата на спонтаност можат да ги привлечат овие потрошувачи. Поп-ап продавници, флеш-продажби или ексклузивни понуди со ограничено време се методите со кои може да се привлечат купувачите да купуваат импулсивно. Алтернативните начини на плаќање се уште поважни за трендот „тука и сега“ – тие се флексибилни решенија што помагаат да се олеснат финансиските оптоварувања на потрошувачите. Популарниот модел „купи сега, плати подоцна“ ги распределува трошоците за дискрециските артикли на одреден период, така што потрошувачите се чувствуваат удобно при наплатата. Програмите за лојалност овозможуваат готовински поврат на кредитот или наградни поени за купување. Новите опции за заем или кредит може да ги направат дискрециските производи достапни за поширока група купувачи.
Изгледи
Купувачите се принудени да штедат, но не сакаат да преживуваат – инстантното задоволство може силно да ги мотивира. Цената не е единствениот фактор за овие одлуки за купување, емоцијата има еднаква тежина. Флексибилните решенија за плаќање ја зголемуваат куповната моќ и го ублажуваат притисокот од трошоците, а со тоа им помогнат на потрошувачите да трошат на сопствената среќа. Маркетинг-стратегиите на брендовите треба да ги таргетираат потрошувачите во вистинско време со вистинската порака. Тие треба да ги следат трендовите во активностите за купување за да можат да ги приспособат промоциите и комуникацијата во реално време.
- ОЖИВЕАНИ РУТИНИ
Надвор и наоколу
Потрошувачите се приспособуваат на нов (животен и професионален) распоред и се обидуваат да се вратат во реалноста. Тие се желни да продолжат со своите животи и покрај неизвесностите што им претстојат. Компаниите треба да бидат подготвени за пораст на потрошувачката надвор од домот. Бизнисите треба да донесат забава, повторно да ги ангажираат потрошувачите и да им помогнат да постигнат чувство на нормалност.
Подготвени за дружба
Неколкуте бурни години ги поттикнаа потрошувачите да копнеат по реални искуства, дружења и по нормални, секојдневни активности. Луѓето не сакаат да бидат во кафез, туку да се дотераат и да излегуваат. Тие сè почесто ги посетуваат канцелариите – хибридните распореди ги враќаат вработените на работното место. Концертите се враќаат. Ноќниот живот е ревитализиран. И резервациите за ресторани се во пораст. Потрошувачите ги продолжуваат социјалните дружби за да се вратат на вистинскиот пат. Трендот „оживеани рутини“ ги комбинира навиките поттикнати од пандемијата со желбата и обидот за враќање во едно поедноставно време.
Полет во чекорот
За брендовите е неопходно да чекорат во чевлите на купувачите за вистински да разберат каде и како производите се вклопуваат во нивните животи. Компаниите ги дизајнираат своите маркетинг-стратегии преку призмата на секојдневните пригоди. Во време на промени, маркетерите најдобро ќе привлечат нови купувачи само ако им демонстрираат како производите се вклопуваат во нивните секојдневни рутини. Модните и козметичките брендови имаат голема корист од овој тренд бидејќи потрошувачите се облекуваат за да импресионираат. Домашната потрошувачка доминираше во продажбата за време на пандемијата, но сега на сцена се враќаат купувањето во движење и искуствата надвор од домот. Трендот „оживеани рутини“ е можност за брендовите да ја подобрат стратегијата за дистрибуција во трговијата. Секторите за храна, пијалаци и разонода се подготвуваат повторно да воведат забава и возбуда надвор од домот.
Изгледи
Брендовите имаат шанса да создадат долготрајни односи со купувачите што сакаат повторно да го откријат светот. Целта на бизнисите треба да биде охрабрување и поддршка на луѓето што сакаат да се вратат во оживеаните рутини. Производите и услугите што ја зголемуваат самодовербата ќе надвладеат, а искуствената малопродажба и услугите за храна би можеле да ги зајакнат ангажманите на брендот, авантурата и ентузијазмот.
- ТАА СЕ БУДИ
Фокус на женската еднаквост
Борбата за правата на жените станува сè погласна и посилна. Репродуктивната автономија и сексуалното здравје се во центарот на вниманието. Луѓето не се повлекуваат додека не дојде до позитивна промена. Сите организации треба да бидат апологети на трендот „таа се буди“. Различноста, правичноста и инклузивноста треба да бидат во центарот на основните вредности.
Разбивање на пристрасноста
Потрошувачите бараат женска еднаквост. Движењето #MeToo беше катализатор за општествени промени. Пресвртот во случајот „Роу против Вејд“ во САД, смртта на Џина Махса Амини во Иран и мексиканскиот случај со фемицид на Дебани Ескобар, меѓу многубројните други родови неправди, предизвикаа бес низ целиот свет. Преземени се чекори за решавање на системските бариери, но родовата дискриминација останува очигледен проблем. Жените проактивно ја кршат стигмата и ги преиспитуваат предрасудите. Тие им пркосат на општествените норми и стереотипните улоги додека го потврдуваат својот авторитет. Жените-купувачи сакаат фер застапеност. Купуваат брендови што се залагаат за каузата и ги фаворизираат производите што водат сметка за нивната корпулентност, возраст или животна фаза. Во работните средини, жените очекуваат работодавците да постават еднакви стандарди. Ресурсите, придобивките и флексибилноста треба да бидат во служба на нивната благосостојба.
Застапници на жените
Подемот на жената не е нешто што може да се игнорира. Родовата еднаквост отвора можности за бизнисите и како работодавци, но и како играчи на пазарот. Различноста, правичноста и инклузивноста треба да бидат вградени во компаниската култура на сите бизниси. Луѓето сакаат да работат во компании што инвестираат во вработените – од образование до групи за поддршка. Лидерите треба да ги постават, дефинираат и да ги исполнат овие очекувања. Првенствено, фокусот беше на подобрување на работните услови, но во меѓувреме беа поставени многу повисоки нивоа што треба да се достигнат. Здравствените услуги за напредна грижа на жените беа меѓу првите што беа прифатени. Во изминатите неколку години експлодираа и инвестициите во т.н. женска технологија (femtech – female technology). Модните компании го прошируваат асортиманот на производи за да бидат поинклузивни и да опфатат повеќе возрасни групи. Производителите на храна и суплементи развиваат формулации што ги таргетираат потребите за исхрана за време на бременост, постпородилниот или во периодот на менопауза.
Изгледи
Луѓето одбиваат да молчат за прашањата за родовата нееднаквост. Вистинската трансформација ќе биде изградена преку правичната застапеност, правичноста и инклузивноста. Жените поддржуваат брендови што се усогласени со нивните вредности. Производите и услугите на компаниите треба да имаат позитивно влијание. Нивната женска публика сака да се чувствува слушната и да биде почитувана. Комуникацијата треба да биде приспособена, сочувствителна и поврзана. Застапувањето за еднакви можности треба да биде корпоративно ветување, а не рекламен трик. Заложбите на компаниите за намалување на родовиот јаз ќе го позиционираат брендот како сојузник на трендот „таа се буди“.
- ЕНЕРГИЧЕН РАЗВОЈ
Животот во перспектива
Луѓето ја поминаа точката на исцрпеност. Исцрпеноста е на највисоко ниво досега. Преоптоварените потрошувачи вложуваат помалку труд и даваат сè од себе за да преживеат. Бизнисите можат да одговорат на овој замор од светот со маркетинг што ја намалува бучавата, обезбедувајќи производи и услуги што ги опфаќаат непосредните потреби.
Во ред е да се биде обичен
Што е премногу, премногу е! Потрошувачите одбиваат да работат прекувремено за сметка на нивната ментална благосостојба. Се појавува замор кај потрошувачите, додека нивниот живот поминува низ хаотични и непредвидливи времиња. Работите што некогаш биле важни, повеќе не се – барем не на начинот на кој биле порано. Потрошувачите сакаат да го продолжат животот исполнувајќи ги своите секојдневни обврски без да ја исцрпат енергијата во тој процес. Тие паузираат и прават чекор назад. Личните потреби ги ставаат над сè друго. Бараат мир и утеха. Овие потрошувачи купуваат производи за подобрување на расположението што ќе обезбедат чувство на смиреност и удобност.
Подобар баланс
Бизнисите се обидуваат колку што е можно да им го олеснат животот на преоптоварените потрошувачи, кои сакаат рамнотежа во личниот и професионалниот живот. Јасните граници, подносливиот обем на работа, правичната компензација и транспарентната комуникација ги одржуваат работниците ангажирани. Корпорациите, како што е „Линкдин“, имплементираа дополнителни платени еднонеделни празници како дел од стратегијата да го спречат истоштувањето на вработените. Одредени земји преминуваат кон четиридневна работна недела за да ги подобрат мотивацијата и продуктивноста. Овој тип потрошувачи бараат производи што промовираат ослободување од стресот и овозможуваат благосостојба или релаксација. Од овие причини, тие може рекреативно да користат канабис.
Изгледи
Годинава потрошувачите продолжуваат да го бараат вистинскиот баланс. Тие ги перципираат компаниите како застапници за нивното физичко и ментално здравје. Вработените бараат повисок квалитет на канцеларискиот живот, пред трајно да се вратат на своите работни маси. Компаниите мора да обезбедат работни места што овозможуваат поддршка и доверба. За бизнисите, приоритет ќе биде да проценат како нивните понуди можат да додадат вредност.
- МЛАДОСТ И ДИСРУПТИВНОСТ
Светот е сцена
Експресивни и прогресивни – припадниците на генерацијата Z ги преземаат работите во свои раце, а истовремено се зголемува и нивната финансиска слобода. Овие потрошувачи се залагаат за сопствените верувања и се истакнуваат со нив. Нивното внимание го привлекуваат вистински, сурови и релевантни содржини. На брендовите им е потребно брзо да се движат за да ги задоволат барањата на овие трендсетери и да бидат во чекор со нивните очекувања.
Влијателни, а не под влијание
Генерацијата Z е економска сила која опфаќа речиси една четвртина од населението во светот. Пандемијата ги обликува овие млади луѓе во нивните најважни години на развој, што во превод значи дека тие се поотпорни од другите групи потрошувачи и имаат повисоки очекувања. Овие млади дисруптори се на работ на финансиска независност, а нивното неконвенционално воспитување ќе го трансформира бизнисот. Родени се како дигитални домородци и технологијата е составен дел од нивната ДНК. Припадниците на генерацијата Z инвестираат во нивните онлајн-личности и се фокусираат на персонализирани брендови. Социјалните медиуми како „Тик-ток“ се нивната сцена за претставување, пребарувач за откривање и профитабилен пат во кариерата. Милениумците беа првите креатори на содржини, но генерацијата Z го зголемува влогот. Овие млади луѓе се имуни на традиционалното рекламирање. Автентичноста и социјалното влијание ја прават разлика. Сакаат да чувствуваат вистинска поврзаност со брендовите. Не се плашат да изразат загриженост – минатата година повеќе од една третина од нив на социјалните мрежи ги споделија своите ставови за социјалните и политичките случувања.
Реално > идеално
Кај припадниците на генерацијата Z одекнува транспарентната, искрена и поврзана комуникација. Успешните брендови што со себе носат приказна можат да воспостават силни врски со овие потрошувачи. Компаниите го усогласуваат гласот на брендот со неговата повисока цел. Генерацијата Z повторно ги напиша правилата за социјалните медиуми, на кои брендовите мора многу да внимаваат. На сведоштвата, коментарите и рецензиите им се верува многу повеќе отколку на традиционалното рекламирање. Кратката и интерактивна содржина, кориснички генерирана, го поттикнува нивниот ангажман. Односите меѓу брендот и купувачите треба да бидат заемно корисни. Овие млади дисруптори не се инхерентно лојални и не може да се третираат како трансакции. Тие треба јасно да ја видат вредноста во интеракциите со брендот за да станат постојани купувачи.
Изгледи
Социјалните мрежи се вкоренети во животниот стил на генерацијата Z. Купувачите скролаат по нив во потрага по инспирација, образование и рецензии. Обемот на вниманието се намалува, но содржината експлодира. Брендовите имаат само неколку секунди за да се истакнат. Наративот е клучен – приказна за брендот е тоа што продава. Сепак, постапките зборуваат погласно од зборовите. Празните ветувања или молчењето за одредени социјални прашања може да го сруши угледот на брендот. Довербата се создава кога компаниите ги исполнуваат своите обврски. Наместо типични реклами, тие треба да дозволат нивниот бренд да зборува сам за себе.
