Променливоста и приспособливоста се движечки сили на новите глобални потрошувачки трендови.
Извор: „Еуромонитор интернационал“
Секоја година „Еуромонитор интернационал“ ги идентификува новите трендови за кои се очекува дека ќе бидат двигатели на индустријата. Овие трендови овозможуваат преглед на промената на потрошувачките вредности, истражуваат како се менува однесувањето на потрошувачите и предизвикуваат нарушувања во бизнис-активностите на глобално ниво.
Кои сме и што сме во 2021 година?
Во 2020 година светот се промени и на добро и на лошо. Пандемијата на коронавирусот влијаеше врз сите нас. Се развиваа нови навики – начинот на кој сега се однесуваме, трошиме и консумираме, никогаш нема да биде ист. Сакаме светот да го направиме подобар – за нас лично, но и за човештвото. Сакаме животот да го направиме поудобен и побезбеден, однатре и однадвор. Во услови на загриженост и различни превирања бараме холистички и флексибилни решенија, поосмислена потрошувачка и, во некои случаи, начини на возвраќање на ударот.
Променливоста и приспособливоста се движечки сили на новите глобални потрошувачки трендови во 2021 година. Пандемијата го создаде, забрза или влијаеше врз секој од 10-те тренда, засекогаш менувајќи го однесувањето на потрошувачите. И покрај тешкотиите со кои се соочија во 2020 година, потрошувачите не се предадоа. Тие продолжуваат да го издигнуваат својот глас и да чекорат напред со заложби за подобро утре.
- РЕИЗГРАДБА – втора шанса да подобра иднина
Потрошувачите повеќе не ги доживуваат бизнисите како ентитети водени од профит – тие од компаниите не очекуваат да се грижат само за сопствените приходи. Новите очекувања се заштита на здравјето и интерес за општеството и планетата, со цел да се изгради нешто подобро. Компаниите треба да помогнат во преобликувањето на светот на поодржлив начин, преминувајќи од економија базирана на обем во економија водена од вредност, која е свртена кон социјалната нееднаквост и влијанието врз животната средина.
Големо ресетирање на однесувањето
Најголемите приоритети за потрошувачите пред Ковид-19 беа користењето помалку пластика и загриженоста за климатските промени. За време на пандемијата, вниманието на јавноста се префрли од побавно движечките закани за животната средина кон итните социјални приоритети. Потрошувачите очекуваат брендовите да ги штитат здравјето и благосостојбата на работниците и да им помагаат на локалните заедници.
Здравствената криза длабоко влијаеше врз потребите и врз навиките за купување. Потрошувачите ја зголемија наклонетоста кон брендовите со силно чувство на социјална одговорност. Со оглед на тоа што компаниите им даваа приоритет на луѓето пред профитот, загриженоста за планетата беше тргната од преден план. Сепак, пандемискиот фокус на социјалните иницијативи нема да ја потисне еколошката свест. Потрошувачите повторно ќе градат за подобра иднина, барајќи брендови што помагаат светот да се направи почист, поздрав, поотпорен и правичен.
Подобри бизниси за подобар свет
За време на карантинот, потрошувачите посветуваа големо внимание на активноста на компаниите. Активизмот на брендот разви ново чувство за социјална цел. Приоритет за бизнисите станаа социјалната акција и можноста да им се помогне на потрошувачите да постигнат поодржлив начин на живот.
За време на пандемијата, главните извршни директори комуницираат отворено и сочувствително, преземајќи иницијативи за заштита на вработените, купувачите и заедниците. Ковид-19 им даде шанса на деловните субјекти повторно да се изградат, да развијат емоционални врски со потрошувачите и да се залагаат за најранливите.
Поглед кон иднината
Се очекува потрошувачите да продолжат посериозно да ги сфаќаат социјалните и еколошките проблеми, наградувајќи ги бизнисите што го користат профитот за подобра постковид-иднина. Брендовите што градат позелен и порамноправен свет ќе стекнат не само конкурентска предност, туку ќе ја добијат и неопходната социјална лиценца, т.е. довербата од општеството, за да продолжат да работат.
- КОПНЕЖ ЗА ПОГОДНОСТ – од секогаш достапни до претходно испланирани искуства
Потрошувачите бараа погодност уште во светот пред пандемијата. Но, пред да бидат нарушени нивните секојдневните навики, копнежот за погодност го земаа здраво за готово. Денес бизнисите се под притисок брзо да ги приспособат активностите за да развијат флексибилното искуство за купувачите, задржувајќи ја погодноста. Компаниите мора да го зачуваат брзото и беспрекорно оперирање низ сите продажни канали.
Посетите на продавниците не се добредојдени
Ковид-19 ги намали импулсивните купувања, а посетите на физичките продавници претходно се планираат. Потрошувачите временски планираат поголем дел од активностите што некогаш ги правеа спонтано, како што се посети на продавници, социјални настани и вечера надвор од домот.
Пандемијата го забрза усвојувањето на дигиталниот канал на купување, кој овозможува беспрекорно искуство без личен контакт. Сепак, користењето на услугите на е-трговијата варира меѓу генерациите, а бизнисите треба да ја имаат предвид разликата меѓу тоа што купувачите од различни возрасти го сметаат за погодно. Помладите потрошувачи претпочитаат дигитални интеракции, додека постарите претпочитаат разговор со луѓето што ги нудат услугите.
Враќање на изгубената погодност на физичката продавница
Ковид-19 ги наруши синџирите на снабдување, ги попречи корисничките услуги и предизвика доцнење на испораките. Бизнисите мора да најдат начин како да ги неутрализираат непријатностите што ги предизвика коронавирусот и на некој начин да го вратат нормалното купувачко искуство. Британскиот трговец со електроника „Карис“ ги пренасочи вработените од продавниците виртуелно да разговараат со купувачите, во обид да им ги овозможи искуствата како во физичките продавници.
Поглед кон иднината
Со економскиот пад се очекува да се намали и побарувачката, така што погодноста ќе игра клучна улога во одлуките за набавка. Потрошувачите ќе избираат бизниси кои јасно ја приоретизираат безбедноста, но истовремено успеваат и да ги минимизираат промените во утврдените моделите на купување. Ковид-19 ќе послужи како тест-период. Компаниите што користат висока технологија и ја негуваат виртуелната комуникација со потрошувачите имаат можност да тестираат операции за самопослужување, без допир или без надзор.
- ОАЗИ НА ОТВОРЕНО – спас за заробените потрошувачи
Здравствените закани, ограничувањата за средби во затворен простор, рестрикциите за движење и зголемувањето на работата од далечина резултираа со потрошувачи свртени кон оазите на отворено. Се зголеми бројот и на луѓето што размислуваат да се преселат од густо населените градови во рурални области. Компаниите инкорпорираа во работата напредни здравствени мерки, а настаните ги префрлија на отворено, овозможувајќи им на потрошувачите да се чувствуваат безбедно надвор од домот.
Затворениот простор во отворен, урбаното во рурално
Жителите на градот трагаат по оази на отворено, кои позитивно влијаат врз нивната ментална и физичка благосостојба. Потрошувачите сè уште копнеат по социјализација и човечка поврзаност, и покрај здравствените опасности што демнат на големите собири. Оазите на отворено се промена на секојдневната сценографија и будат чувство на поврзаност во услови кога човекот е исклучен од толпата. Вечерите, вежбањето, дружењето и релаксирањето на места на отворено стануваат неопходни за заробените потрошувачи.
Со оглед на фактот што работата на далечина станува нова нормалност, идејата за замена на градскиот со рурален живот станува сѐ попривлечна. Руралните средини се поздрави животни средини и се помалку загадени, а иселувањето од скапите градови помага да се олесни и финансискиот товар. Потрошувачите сакаат да ѝ се вратат на природата, но да останат во контакт преку технологијата и да учествуваат во виртуелните искуства.
Бизнис на отворен простор
Компаниите организираат активности на отворено – настани, саеми и концерти, за да се компензира недостигот од активностите во затворено. Рестораните, кината и фитнес-центрите брзо се приспособуваат на промените. Сѐ помногубројни стануваат и опциите за сместување на отворено, глампување (кованица од гламур и кампување). Освен тоа, и DIY-трендот (Do it yourself, направи сам) и желбата за поврзување со природата го поттикнуваат порастот на градинарските производи и услуги низ целиот свет. Намалената употреба на јавниот превоз и споделувањето на превозот, исто така, се заменуваат со поздрави навики, како пешачење и возење велосипед или скутер.
Поглед кон иднината
Настаните и активностите на отворено ќе продолжат да се развиваат. Нивната предност е во тоа што се корисни и за менталната благосостојба. Компаниите можат да ги репродуцираат затворените активности на отворено, со изградба на привремени структури и подобрување на инфраструктурата.
- ФИГИТАЛНА РЕАЛНОСТ – колизија на физичкиот и дигиталниот свет
Дигиталните алатки им овозможуваат на потрошувачите да останат поврзани додека се дома и безбедно да излезат во надворешниот свет. Фигиталната реалност е хибрид од физичките и виртуелните светови, во кој потрошувачите можат беспрекорно да живеат, работат, купуваат и да се разонодуваат. Бизнисите можат да ги интегрираат виртуелните процеси во нивните физички простори за да им обезбедат удобност на потрошувачите што претпочитаат да останат дома кога ќе се осмелат да излезат надвор.
Дома или далеку, дигиталноста е секојдневие
Потрошувачите масовно прифатија да ги користат интернет-уредите за да ги одржуваат дневните рутини во текот на пандемискиот карантин. Видеоконференциите, паметните уреди и различните технологии (аугментирана и виртуелна реалност) им помогнаа на потрошувачите да создадат нови навики околу работењето, учењето, вежбањето, купувањето и дружењето. Овие дигитални алатки ја овозможија фигиталната реалност, која потрошувачите виртуелно ги поврзува и покрај тоа што се физички одделени од надворешниот свет. Потрошувачите, особено помладите генерации, се рамнодушни кон тоа дали нивните секојдневни активности се физички или виртуелни – тие веќе не ни прават разлика меѓу двете опции.
Мешаната реалност ја поттикнува продажбата
Традиционалните продавници (брик & мортар) ја користат фигиталната реалност, спроведувајќи процеси што ги охрабруваат купувачите безбедно да го посетат објектот со помош на паметни уреди. Усвојувањето системи за мобилни резервации, QR-кодовите за бесконтактни менија и плаќања и виртуелните простории во продавниците се стратегии што компаниите ги преземаат за да ги минимизираат меѓусебните интеракции.
Поглед кон иднината
Новоразвиените навики ќе ги одржат ангажирани потрошувачите во виртуелните настани и интеракции. Виртуелните алатки ќе станат составен дел од бизнис-операциите. Доколку трговците сакаат да ги вратат потрошувачите во физичките продавници и притоа да им го осигурат чувството на безбедност, интеграцијата на виртуелните процеси во физичките продавници е императив. Компаниите што овозможуваат безбедно и незаборавно искуство преку повеќе методи и платформи ќе развијат најголема лојалност кај потрошувачите. Инкорпорирањето на фигиталната реалност ќе продолжи да ја води продажбата и ќе помогне при собирањето податоци, и преку интернет и во продавницата.
- ИГРА СО ВРЕМЕТО – новооткриената флексибилност го менува распоредот
Потрошувачите денес се поспособни, но и попринудени да бидат креативни со своето време ако сакаат сè да завршат. Бизнисите треба да обезбедат решенија што се однесуваат на потребата на потрошувачот да го максимира времето, нудејќи поголема флексибилност, особено со производи и услуги до кои може да се пристапи од или во близина на домот.
Поавтономно управување со моментите
Новооткриената флексибилност им обезбедува на потрошувачите повеќе време, но откривањето како најдобро да се искористи тоа време може да биде тешко. Управувањето со работата, семејството, социјалниот и личниот живот претставува и предизвик и можност. Поставувањето граници стана императив кога поголемиот дел од случувањата се преселија во домот. Истовремено, потрошувачите имаат можност да извршуваат повеќе задачи во текот на денот – присуство на состанок, следење онлајн-настава, завршување административни работи..., во време кое е соодветно на нивниот распоред.
Култура на 24-часовна услуга
Бизнисите се во чекор со играта со времето – традиционалниот работен ден од 9 до 17 часот се менува за да овозможи флексибилност. Развојот на културата на 24-часовна услуга им наложува на деловните субјекти да се приспособат и да понудат услуги, според распоредот на потрошувачите. Освен тоа, бизнисите ќе размислуваат и за нови физички локации. Потрошувачите сѐ помалку го користат јавниот превоз и најчесто престојуваат во радиус од 15 минути од домот, што ја намалува фреквенцијата во центрите на градовите. За да останат видливи, бизнисите веројатно ќе треба да размислат за преселба.
Поглед кон иднината
Потрошувачите продолжуваат да поминуваат повеќе време дома и помалку да патуваат. Од тие причини, играта со времето се очекува да остане силен тренд. Компаниите што го имаат предвид тој тренд треба да се сметаат за партнери, бидејќи им помагаат на потрошувачите да се приспособат на новиот начин на живот, според кој активностите се закажуваат според неконвенционален редослед. Новото ниво на флексибилност ќе го промени начинот на работа на компаниите. Бизнисите мора да бидат свесни за тоа како потрошувачите го користат сопственото време, за подобро да ги позиционираат тековните производи и услуги и да ги развиваат новите решенија.
