„Виолета“ ја купи фабриката за кекси и вафли „Ласта“

Фабриката за кекси и вафли „Ласта“ од Чапљина е продадена на аукција, пренесе „Чапљински портал“.

Аукцијата се одржа вчера.  

Стечајната управителка Бехрија Хусеинбеговиќ, која ја водеше постапката за „Ласта“, потврди дека нов сопственик е компанијата „Виолета“. 

Аукцијата беше успешна, фабриката „Ласта“ е продадена на купувач, односно на сопственикот на компанијата „Виолета“, и можам да кажам дека фабриката го продолжува производството, изјави Хусеинбеговиќ. 

Ова беше четврта аукција за продажба на недвижноста, опремата и нематеријалниот имот на „Ласта“. Оваа компанија во стечај на почетокот на годинава повторно го почна производството со надеж дека ќе најде стратешки купувач кој ќе ги „оживее“ погоните и ќе обезбеди работа за работниците. 

Производството во фабриката беше запрено кон крајот на 2016 година, кога тогашниот директор Иван Рагуж им рекол на работниците дека почнува колективниот одмор. Прекинот на производството беше обелоденет на 26 јануари минатата година и оттогаш, вратите на фабриката беа затворени.