Комората на трговци од Солун одби да дојде во Скопје

Комората на трговци од Солун негативно одговори на поканата да биде дел од бизнис делегацијата што ќе го придружува грчкиот премиер Алексис Ципрас за време на неговата посета на Македонија, пренесе Македонската информативна агенција (МИА). 

Комората ја донесе оваа одлука на состанокот на извршниот комитет, а претседателот на Комората, Михалис Зорпидис, ја поврза со прашањето за името.

Одговарам до „Enterprise Greece“ што ја координира делегацијата, дека Комората на трговци од Солун одлучи да не учествува во никаква активност што се поврзува со соседната земја, се додека користи име што не ѝ припаѓа. Прашањето беше тема на последниот состанок на Извршниот комитет, чии членови едногласно одлучија дека Комората го прави ова во знак на протест и реакција кон политиката што не го изразува грчкиот народ, изјави Зорпидис. 

Во исто време со одбиената покана од Комората, грчкиот премиер Алексис Ципрас, денес е во Солун каде што ќе учествува на дебата со бизнисмени од Северна Грција на тема „Развојните перспективи на бизнисите од Северна Грција по Договорот од Преспа“.