„Макпрогрес“ произведува житни барови со сопствена технологија

Виничката компанија „Макпрогрес“ го прошири продуктното портфолио со линија житни барови Balance.

Како што соопштуваат од компанијата, технологијата  за производство е развиена од тимот технолози на „Макпрогрес“. Новата инвестиција за производство на Balance отвори нови 15 работни места, а се најавуваат уште 30 во следниот период.

Во време кога сите сме соочени со големи предизвици, здраствени и економски, одлуката да опстоиме на плановите и визиите беше посилна од сè. По долг период на напорна работа и истражување, нашиот тим технолози ја разви новата линија за производство на барови. Особено горди нè прави фактот што станува збор за сопствена технологија. Со оваа линија барови ја надополнуваме палетата производи и ги зголемуваме можностите за развој во сегмент, во кој досега не сме биле присутни, велат од „Макпрогрес“.

Житните барови Balance се произведени од интегрален овес, ориз и пченка, интегрални колачиња (од интегрално брашно и интегрален овес). Засега на пазарот се лансирани три вкуса: бел крем, чоколадо и сушено црвено овошје. Баровите се достапни во две варијанти – поединечно пакување (23 г) и комбо-пакување (5 X 23 г).