Уставниот суд утре треба да „пресече“ дали ќе се работи во недела

Уставниот суд утре ќе расправа за неделата како неработен ден, потврдија од оваа институција преку соопштение до медиумите.

Вчера, претседателот на Стопанската комора на Македонија, Бранко Азески, рече дека оваа асоцијација на стопанствениците не ја повлекла иницијативата за оцена на уставноста за неработењето во недела. Тој рече дека во јануари имале две недели да се постигне договор со Владата за ова горливо прашање за бизнисот. Бидејќи до договор не дошло, иницијатаивата не е повлечена, а конечната одлука се очекува да ја донесе Уставниот суд. 

Од Уставниот суд денес соопштија дека на седницата којашто е закажана за утре, 14 септември, во 9:30 часот ќе расправа и за Рефератот У.бр.4/2022 кој е подготвен по претходно поднесена иницијатива од страна на Стопанската комора на Северна Македонија.

Се работи за предмет во кој е оспорен Законот за изменување и дополнување на Законот за работните односи, кој што во својата содржина опфаќа ‘работа во недела, посочија од Уставниот суд.