Една година од регистрацијата на малите семејни винарници

Помина една успешна година откако најголем дел од членовите на здружението „Тиквешки семејни винарии“ се впишаа во регистарот на производители на вино.

И во време на пандемија произведовме врвни вина што се закитија со многу домашни и меѓународни награди, изјави Горан Јаковлевски, претседател на здружението со седиште во Кавадарци.

Тој упати благодарност до Министерството за земјоделство, шумарство и водостопанство  и до другите државни институции, со чија помош здружението и понатаму ќе продолжи да дејствува за развој на регионот и Македонија како винско-туристичка дестинација.

Јаковлевски потсети дека по законските олеснувања, пред една година почна регистрацијата на малите семејни винарници и додаде дека сега, регистрирани се педесетина фамилијарни вински бизниси во целата држава, најмногу во Тиквешијата. Се спремаме за новиот гроздобер, имаме квалитетен род во лозјата и очекуваме успешна берба. Тројца од нашите членови  добија грантови,  поддршка за млади земјоделци од по 20.000 евра за опрема во винските капацитети, рече тој.