Ана Мекмахон: Позитивно влијаеме и врз потрошувачите и врз планетата

Годинава беше повик за будење на планетата. Ефектите од кризата и алармантните предупредувања за климатските промени бараат итна и храбра реакција на компаниите од целиот свет.

Разговараше: Ана Филиповиќ, ana@instore.rs

Ана Мекмахон по потекло е од Србија, а студиите ги завршила во САД, каде што останала да живее и да работи. Во 1992 година се запишала на факултет да изучува хемија, но на постдипломските студии се префрлила на маркетинг и истражувања. Комбинирајќи го целото знаење, таа почнала да работи во „Информејшн ресорсис инк.“ за „Пепсико“. Преминала во „Унилевер“, каде што 11 години работела во Чикаго, Лондон и во Токио, по што прави трансфер во „Лореал“. Во 2014 година Мекмахон ѝ се придржува на компанијата, на одделот за меѓународен маркетинг на Garnier во Њујорк. По една година се премести на одделот за професионални производи и околу 3 години работи на брендот Redken, задолжена за меѓународниот пазар. Од 2019 година е одговорна за Јадранско-балканскиот Регион, во кој работи на интерната трансформација и го води одделот со производи за масовна потрошувачка.

Верувам дека, пред сѐ, мора да го сакате тоа што го работите. Во спротивно, не сте искрени кон себе и треба да престанете да го работите тоа затоа што животот е краток. Моето мото е: Учи и стекни нови искуства, колку што е можно повеќе. Исто така, мислам дека би требало да бидеме заинтересирани за различни култури и за разбирање на луѓето, бидејќи тоа може да ни помогне во работењето. Особено ако работиме во маркетинг и тоа знаење го примениме за исполнување на потребите на различни потрошувачи за да ги направиме среќни, вели Мекмахон.

Во Србија се вративте во 2019 година. Како дојде до тоа, откако повеќе од две децении поминавте во САД?

Компанијата почна интерна трансформација во Јадранско-балканскиот Регион и мене ми беше доделена задачата да го водам одделот со производи за масовна потрошувачка. Тоа е најголемиот оддел во системот, во чии рамки на нашите пазари се брендовите L'Oreal Paris, Garnier, Maybelline, NYX, Mixa и Essie. Во овој регион спаѓаат сите земји на поранешна Југославија, плус Бугарија и Албанија, а мојата позиција подразбира управување со одделот на сите тие пазари. Најпрвин ја поставивме амбицијата подобро да одговориме на потребите на потрошувачите и да ги унапредиме партнерствата со клиентите. Сега сме во втората фаза, кога се движиме во насока на усвојување на приспособените однесувања и начини на работа. Во третата фаза, која е пред нас, нѐ очекуваат плодовите од нашата работа и ќе бидеме во можност уште повеќе да им помогнеме на потрошувачите да ги остварат соништата и аспирациите за убавина.

Што сѐ спаѓа во описот на Вашата работа?

Во одделот со производи за масовна потрошувачка велиме дека нашата улога е да го демократизираме тоа што е најдобро од убавината за сите. Тоа значи дека мојата работа е да ги насочам и да придонесам тимовите да го направат токму тоа – да одговорат на потребите на различните потрошувачи на пазарите што ги водам. Да им помогнеме да ги исполнат соништата за убавината. За мене, тоа значи разбирање на потребите на потрошувачите, но и на клиентите, за да го развиваат бизнисот на профитабилен и на одржлив начин. Целта ни е позитивно да влијаеме врз животот на потрошувачите, но и врз животот на планетата.

Ана Мекмахон: Дојдов за да научам за областите од работењето за кои не знаев претходно, но и да пренесам знаење. Колку сте позрели во кариерата, како што станувате постари, се ориентирате од извршување задачи кон тоа да бидете учител и да ги развивате луѓето. Тоа е улогата во која имам најголема можност да придонесам за тимовите и за сопствениот личен развој. Тоа е најголемата награда за мене, затоа што корените ми се во Србија и сакам да успееме заедно.

Со какви предизвици се среќавате секојдневно и на кој начин ги надминувате?

Понекогаш луѓето мислат дека овие пазари се слични, но всушност тие се многу различни. Тоа што и понатаму е секојдневен предизвик е да се разберат потрошувачите, динамиката на пазарот и мотивацијата на клиентите, за да ги скроиме понудите, односно целокупниот начин на работење на овие простори. Од друга страна, сигурна сум дека предизвик за секој што работи со повеќе пазари е и како да ги сподели мисијата и визијата на сите тие пазари, кога физички секојдневно не е присутен таму. Тоа не е нималку лесно, токму поради физичката дистанца. Предизвикот се трудам да го надминам така што се обидувам повеќе време да поминувам со тимовите, макар и виртуелно.

Како разликите меѓу потрошувачите на Балканот се одразуваат врз работата на компанијата?

За тој што ги гледа овие пазари од дистанца, сето тоа е Балкан. Но, за тој што ги гледа работите однатре – тоа се многу различни пазари. За да бидете во можност да одговорите на потребите на сите жени и мажи на овие пазари, пред сѐ, мора да ги разберете. Многу е тешко да се разберат луѓето што површински изгледаат слично, но ако се навлезе подлабоко, тие се мотивирани на различен начин. Во овој регион аспирациите кон убавината се многу различни, како и типовите кожа, коса... Физичките особини, но и емотивните се многу различни. Станува збор за разбирање на сите тие луѓе и мора да бидеме уверени дека им служиме на најдобриот можен начин со нашите глобални производи и брендови. Мора да се осигуриме дека го има тој финален локален пресврт, кој ќе ги направи нашите производи прифатливи на сите овие пазари. Компанијата во регионот работи како хаб и ние треба да пронајдеме начин како да ги отвориме очите за малите детали.

Под локален пресврт се подразбира квалитетот на производите или станува збор за нешто друго?

Во земјите во кои работиме постојат различни типови кожа, коса... и ние развиваме производи за сите тие различни потреби. „Лореал“ има истражувачки развојни центри низ целиот свет и производите ги развиваме глобално, но на секој поединечен пазар пласираме избрани производи од портфолиото, во зависност од реалните потреби на потрошувачот. Втора работа што „Лореал“ сѐ повеќе ја практикува е тоа што правиме повеќе производи што се тестираат на различни типови кожа за да ги исполнат потребите и очекувањата на сите. На различни локации имаме фабрики, каде што се прават одредени производи, кои оттаму, целосно со ист квалитет, се дистрибуираат низ целиот свет.

Истите напори се прават за да се изненади и воодушеви една жена во Скопје како и една жена во Канзас Сити. И двете се еднакво важни.

Колку Јадранско-балканскиот Регион е значаен за целокупното работење на глобалната компанија?

Ако мисијата ни е да го демократизираме тоа што е најдобро од убавината за сите, тоа значи дека секој пазар, како и секој потрошувач, е важен колку и кој било друг. Искрено верувам во тоа. Истите напори се прават за да се изненади и воодушеви една жена во Скопје како и една жена во Канзас Сити. И двете се еднакво важни.

Дали вложувате напори и кога станува збор за машкиот пол?

Ќе бидам фер и ќе кажам дека поголемиот дел од нашите потрошувачи се жени. Но, нашите производи се и во служба на мажите. Ја приспособуваме понудата на најразлични целни групи од целиот свет – имаме понуда и за најмладите, но и за повозрасни луѓе. Сметаме дека мажот не треба да ѝ го „краде“ кремот на жената, затоа и му даваме негов. Тоа е во согласност со нашата мисија, која гласи: Убавина за сите.

Како пандемијата се одразува врз работењето на компанијата?

Кризата е ризик, но истовремено и можност. На сите ни беше тешко, особено во текот на карантинот, но оваа ситуација нѐ наведе да копаме подлабоко, во смисла на разбирање на потрошувачите и како да се приспособиме на новата нормалност. Тоа го гледам како можност. Сите знаеме дека е-трговијата во регионов не е развиена како на западните пазари. Ковид-19 беше „чкрапалото“ за нејзиниот развој на овие простори и се надевам дека заедно, со сите партнери од сите пазари, ќе продолжиме да вложуваме во овој канал на продажба затоа што едноставно – тоа мора да се случи.

Убавината, односно производите за убавина можеби не се неопходни, но во време на криза, убавите работи ги прават луѓето среќни во тешките моменти. Некои од нашите категории претрпеа пад, што е и логично – на пример, шминката. Но, вниманието кон себеси и малите ситни ритуали, како што се маска на лице или маска за коса, дојдоа до израз во овој период и тие категории забележаа пораст. На тој начин дојде до еден вид баланс.

За тој што ги гледа овие пазари од дистанца, сето тоа е Балкан. Но, за тој што ги гледа работите однатре – тоа се многу различни пазари. Компанијата во регионот работи како хаб и ние треба да пронајдеме начин како да ги отвориме очите за малите детали.

Во последните две децении улогата на компаниите драстично се промени и многу од нив во работата ја вклучија политиката на одржлив развој. Една од водечките компании, несомнено, е „Лореал“, која на средината од минатата година ги претстави новите цели за одржлив развој до 2030 година. Кажете ни нешто за нив!

Годинава беше повик за будење на планетата. Ефектите од кризата и алармантните предупредувања за климатските промени бараат итна и храбра реакција на компаниите од целиот свет. Како компанија број 1 за убавина во светот, имаме должност да ја водиме индустријата кон одржлива иднина. Првата фаза на трансформацијата ја почнавме пред многу години, а напорите ги формализиравме во 2013 година, со програмата „Sharing Beauty With All“, кога поставивме амбициозни цели за редукција на емисиите на CO₂ и намалување на отпадот и користењето вода до 2020 година. До 2019 година не само што ги исполнивме овие цели, туку и ги надминавме. Ја намаливме емисијата на јаглероден диоксид за 78%, а производството, на значително поодржлив начин, го зголемивме за 37%. Сепак, тоа не е доволно. Светот продолжува да се менува, а нашето дејствување е поважно од кога и да е.

Затоа, ја објавивме новата платформа „L'Oreal for the future“ со големи амбиции до 2030 година. Што се однесува до целите, би укажала на три работи. Пред сѐ, потребна е трансформација на нас и почитување на принципот „планетарни граници“. Научниците се сложни дека ги надминуваме т.н. „планетарни граници“, така што ние имплементиравме нова интерна програма на трансформација, со мерки за ограничување на нашето влијание. „Планетарни граници“ е научен концепт и сертифицирана методологија која прецизно одредува кои ресурси ги користиме, каде сме ги надминале границите, а каде не. Целите што се трудиме да ги исполниме не ги поставивме самите, туку тие се научни. Понатаму, го унапредуваме деловниот екосистем при преминот во поодржлив свет. Поставивме многу специфични цели, поврзани со клиентите, доставувачите и потрошувачите во овој процес на трансформација. И на крај, придонесуваме за решавање на светските предизвици со тоа што ги поддржуваме итните општествени и еколошки потреби. За решавање на глобалните последици од пандемијата на Ковид-19 наменивме 150 милиони евра, од кои 50 милиони се за помош на високоранливите групи жени, а 100 милиони ќе бидат инвестирани во истражувања за влијанието на климатските промени, проекти за обнова на оштетените водни и шумски екосистеми, како и за проекти поврзани со циркуларната економија.

Што научивме, и во животот и во работата, од моменталната корона-криза?

Тоа би го нарекла „позитивната страна на Ковид-19“. Произлегоа некои прекрасни работи од тоа што бевме принудени да се однесуваме поинаку во оваа ситуација. Некако сите одеднаш почнавме подобро да управуваме и со сопственото, но и со времето на нашите соработници, клиенти и партнери. Доаѓам од САД, каде што флексибилното работно време и работата од дома се сосема нормални. Сепак, на нашите простори тоа не беше случај. Во оваа ситуација се сруши догмата за работата од дома. Се надевам дека тој прифатлив модел повеќе луѓе ќе го користат како можност и кога ќе излеземе од кризата. И уште две работи – се запознавме и како луѓе, што е прекрасно, бидејќи досега бевме само колеги, а научивме да ги цениме и малите работи во животот.