БРИМА: Потрошувачки навики и навики на пазарење

Автор: Калина Медаровска, раководител на проекти во БРИМА

Првото прашање се однесува на тоа кој пазари за секојдневните потреби во домаќинствата на испитаниците. Од анкетираните, 15% не пазарат за потребите на домаќинството, а 85% пазарат. Oд нив 62% изјавиле дека пазарат повеќе членови во домаќинството, а 23% дека пазари само еден член. Типичниот купувач од домаќинствата е вработен, на средна возраст од 25 до 54 години и со средно образование.

Следното прашање што им го поставивме на испитаниците е: Каде вообичаено пазариш ти или членовите на твоето домаќинство за секојдневните потреби на домаќинството?

Супермаркетите (64%) и минимаркетите (62%) се во најголем процент посетувани, со цел да се купат производи за секојдневните потреби на домаќинствата. Пазарењето во минимаркетите во најголем процент е во пелагонискиот регион (96%), а по него е југоисточниот регион каде што пазарат 78% од домаќинствата. Пазарењето во супермаркети за секојдневните потреби на домаќинството во највисок процент е во скопскиот регион (74%) и во југозападниот регион (71%), а најнизок во југоисточниот (45%) и североисточниот регион на Македонија (48%).

На прашањето во кои сè супермаркети пазарат домаќинствата, се забележува дека четири од пет домаќинства пазарат во некој супермаркет. Во просек се пазарува во 1,8 супермаркети. Испитаниците споменуваат дека пазарат во:

Во Кичево, Струга, Гостивар, Скопје и Велес, во најголем процент се пазари во супермаркети (над 86% од домаќинствата), а пак во Гевгелија и Дебар помалку од половината домаќинства пазарат во супермаркети. Просечните приходи во домаќинството влијаат врз пазарењето во супермаркети, па така домаќинствата со повисоки приходи во повисок процент пазарат во супермаркети, во однос на домаќинствата со пониски приходи. Слично, домаќинствата од урбаните средини (86%) во поголем процент пазарат во супермаркети отколку домаќинствата од руралните средини (75%).

Овие податоци се дел од поопсежната студија во која се истражува кои се конкурентните супермаркети, кој е „главен" супермаркет во домаќинството и се прави евалуација на повеќе аспекти за „главниот" супермаркет, како што се: услуга/ љубезност, разновидност на производи, ниво на цени, изглед/уредност, квалитет на производи, близина на продажно место, хигиена, имиџ, програми за лојалност и др.