„Крафт-Хајнц“ го зголеми буџетот за рекламирање

„Крафт-Хајнц“ ќе ги зголеми маркетиншките ресурси во следните две години. 

Компанијата која е позната по продажба на конзервирана храна и грицки, честопати има „лош имиџ“ во јавноста поради стигмата дека продава нездрава храна. Покрај тоа, се соочува со силна конкуренција од евтините приватни трговски марки на етаблирани синџири како што се „Крогер“ и „Волмарт“. Затоа, Управата на „Крафт-Хајнц“ соопшти дека буџетот за маркетинг ќе се зголеми за 30 отсто, на околу 1,18 милијарди евра, што е прифатливо за акционерите. 

Сличен чекор и се очекуваше, откако минатата година за извршен директор на компанијата беше назначен Мигуел Патрицио, познат експерт во областа медиуми/огласување. 

Веднаш по информацијата, акциите на „Крафт-Хајнц“ скокнаа за 4,6 отсто.