„Алди“ ја забрзува експанзијата во САД

Дисконтниот синџир „Алди“ најави дека планира да отвори 225 нови продавници во САД во 2025 година.

Тоа ќе биде најголемата експанзија во една година за „Алди“ во неговата речиси 50-годишна историја во САД. Во моментов трговецот има повеќе од 2.400 продавници во земјата, што е значително повеќе од приближно 2.000 продавници колку што дисконтерот има во својата матична земја Германија. Како што се наведува во соопштението, американската експанзија е дел од следната фаза на петгодишната стратегија за национален пораст.

Новите продавници ќе бидат отворени преку комбинација на природен пораст, односно со отворање објекти на нови локации, како и со ребрендирање на одредени објекти од синџирите „Вин-Дикси“ и „Харвис“. Со овој потег трговецот го зацврстува присуството во одредени региони и навлегува во нови области.

„Алди“ објави дека минатата година во продавниците успеале да привлечат 19 милиони нови купувачи во САД. Во ноември Дејв Риналдо, претседател на „Алди“ – САД, зборуваше на саемот ПЛМА во Чикаго за плановите за пораст на компанијата. Тој истакна дека моментот е поволен за пораст на приватните брендови во целата индустрија. Приватните брендови доживуваат подем. Во услови на инфлација, купувачите открија дека не мора да го жртвуваат квалитет за да заштедат пари. Всушност, 90% од нив велат дека ќе продолжат да купуваат приватни брендови во иднина, изјави тој.