Кина: Загадувањето со микропластика ја загрозува глобалната безбедност на храната

Кинеските научници идентификуваа значајна, но често занемарена последица на загадувањето со микропластика - неговото штетно влијание врз фотосинтезата, основниот процес кој ја движи примарната продуктивност на Земјата и обезбедува безбедност на храната. Студијата беше спроведена од истражувачи од Институтот за наука за почвата на Кинеската академија на науките (ISSCAS) и Универзитетот „Нанџинг“, а неодамна беше објавена во списанието Proceedings of the National Academy of Sciences, објави „Ксинхуа“.

Микропластиката - пластичните честички помали од пет милиметри - контаминираат средини од длабоки морски седименти до планински глечери. Иако свесноста за еколошките ризици од микропластиката е зголемена, нејзиното влијание врз фотосинтезата на ниво на екосистем останува слабо проучено.

Истражувачите спроведоа сеопфатна анализа на врската помеѓу изложеноста на микропластика и фотосинтезата во копнените, морските и слатководните екосистеми. Користејќи методи на мета-анализа и машинско учење, тие ги анализираа резултатите од 3.286 набљудувања од 157 студии за да го квантифицираат глобалниот пад на фотосинтезата предизвикан од загадувањето со микропластика.

Нивните резултати покажаа дека микропластиката ја намалува фотосинтезата за 7,05 до 12,12% кај копнените растенија, морските алги и слатководните алги. Овие загуби одговараат на проценетиот годишен глобален пад од 4,11 до 13,52% кај клучните основни култури, вклучувајќи ги оризот, пченицата и пченката. Во водните екосистеми, нарушувањата на фотосинтезата предизвикани од микропластиката може да ја намалат нето примарна продуктивност за 0,31 до 7,24 проценти.

Овие наоди ја истакнуваат микропластиката како скриена, но постојана закана за глобалната безбедност на храната, рече Данг Феи, професор на ISSCAS.

Студијата укажа и на можна стратегија за ублажување на овој проблем. Истражувачите процениле дека намалувањето на нивото на микропластика во околината за 13% може да ги намали загубите во фотосинтезата за околу 30%.

Наодите ја нагласуваат итната потреба за решавање на загадувањето со микропластика како клучен фактор кој влијае на глобалната примарна продуктивност. Данг истакна дека студијата ја нагласува важноста од интегрирање на стратегии за намалување на загадувањето од пластика во пошироки иницијативи за одржливост и безбедност на храната.

Истражувачите, исто така, повикаа на проширување на собирањето податоци и спроведување на дополнителни теренски студии за подобро да се разберат механизмите на нарушување на фотосинтезата предизвикани од микропластиката.

Извор: eKapija

Фото: Pexels